बँकॉकहून गांजाची तस्करी करणाऱ्या मॉडेलला अटक
११.८२ कोटी रुपयांचा हायड्रोपोनिक गांजा जप्त
मुंबई : खरा पंचनामा
मुंबई विमानतळावर सीमाशुल्क विभागाच्या एअर इंटेलिजन्स युनिट (AIU) ने मोठी कारवाई करत बँकॉकहून आलेल्या 28 वर्षीय मॉडेल हर्ष सनी हिला हायड्रोपोनिक मारिजुआनाच्या तस्करीप्रकरणी अटक केली आहे.
जप्त करण्यात आलेल्या अमली पदार्थाची किंमत सुमारे 11.82 कोटी रुपये असल्याचा अंदाज अधिकाऱ्यांनी व्यक्त केला आहे.
मिळालेल्या माहितीनुसार, हर्ष सनी ही 10 ते 11 जूनच्या मध्यरात्री एअर इंडियाच्या TG-351 या विमानाने बँकॉकहून मुंबईत दाखल झाली होती. तिच्या हालचाली संशयास्पद वाटल्याने कस्टम्स अधिकाऱ्यांनी तिची आणि तिच्या सामानाची तपासणी केली. यावेळी तिच्या ट्रॉली बॅगेत व्हॅक्यूम-सील्ड स्वरूपातील 12 पाकिटे आढळून आली.
अधिकाऱ्यांनी ही पाकिटे उघडून पाहिली असता त्यामध्ये हिरव्या रंगाचा संशयास्पद पदार्थ सापडला. त्यानंतर NDPS किटच्या साहाय्याने तपासणी करण्यात आली. या चाचणीत संबंधित पदार्थ हा वाळलेल्या गांजाच्या फुलांचा आणि कळ्यांचा असल्याचे स्पष्ट झाले. हा पदार्थ 'हायड्रोपोनिक वीड' किंवा 'हायड्रोपोनिक मारिजुआना' असल्याचे निष्पन्न झाले.
या प्रकरणानंतर सीमाशुल्क विभागाने हर्ष सनीविरोधात अमली पदार्थ प्रतिबंधक कायदा (NDPS Act) अंतर्गत गुन्हा दाखल करून तिला अटक केली. न्यायालयात हजर केल्यानंतर किल्ला न्यायालयाने तिला न्यायालयीन कोठडी सुनावली आहे. हर्ष सनी ही यापूर्वी 'मिसेस केरळ' स्पर्धेत सहभागी झाल्यामुळेही चर्चेत होती.
हायड्रोपोनिक मारिजुआना हा गांजाचा अत्यंत उच्च प्रतीचा आणि अधिक प्रभावी प्रकार मानला जातो. या पिकाची लागवड पारंपरिक मातीमध्ये न करता इनडोअर वातावरणात विशेष तंत्रज्ञानाच्या मदतीने केली जाते. त्यामुळे त्यामध्ये THC (टेट्राहायड्रोकॅनाबिनॉल) या नशा निर्माण करणाऱ्या घटकाचे प्रमाण सामान्य गांजाच्या तुलनेत खूप जास्त असते.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
