हातभट्टीची वाहतूक करणाऱ्या पिकअपला संरक्षण देणाऱ्या कारने राज्य उत्पादन शुल्कच्या दुय्यम निरीक्षकांच्या दुचाकीला दिली धडक
पुणे : खरा पंचनामा
हातभट्टीची वाहतूक करणाऱ्या पिकअप व्हॅनला राज्य उत्पादन शुल्क विभागाच्या दुय्यम निरीक्षकांनी अडविले. या व्हॅनला सरंक्षण देणार्या अॅल्टो कारने दुय्यम निरीक्षकांच्या दुचाकीला धडक देऊन त्यांना खाली पाडले.
त्यामुळे हातभट्टीची वाहतूक करणारा पिकअप व तिला सरंक्षण देणार्या हातभट्टी चालकाची कार पळून गेली. या घटनेत राज्य उत्पादन शुल्क विभागाचे दुय्यम निरीक्षक अनिल यादव हे जखमी झाले असून त्यांच्या हाताला मार लागला आहे.
याबाबत दुय्यम निरीक्षक विशाल कुमार कदम (वय ३०, रा. अष्टविनायक नगर, संघर्ष चौक, चंदननगर) यांनी वाघोली पोलीस ठाण्यात फिर्याद दिली आहे. त्यावरुन पोलिसांनी हातभट्टी चालक जीवन साठे व त्याच्या साथीदारांवर गुन्हा दाखल केला आहे. ही घटना वाघोलीजवळील बावडी गावातील मारुती मंदिराचे मागील चौकामध्ये शुक्रवारी मध्यरात्री साडेबारा वाजता घडली.
याबाबत पोलिसांनी दिलेल्या माहितीनुसार, हातभट्टीची तयार दारु कॅन्डमध्ये घेऊन एक पिकअप व्हॅन जात होती. तिला राज्य उत्पादन शुल्क विभागाच्या दोघा दुय्यम निरीक्षकांनी अडविण्याचा प्रयत्न केला. तेव्हा मागून आलेल्या कारने त्यांच्या दुचाकीला धडक दिली. त्यात ते खाली पडल्याने दोन्ही गाड्या पळून गेल्या. सरकारी कामात अडथळा आणल्याचा गुन्हा दाखल करण्यात आला आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
