सुप्रीम कोर्टाचा गुजरात हायकोर्टाला दणका
गोध्रा कांडानंतर दंगलीतील ६ आरोपींची निर्दोष मुक्तता
नवी दिल्ली : खरा पंचनामा
गोध्रा हत्याकांडानंतर झालेल्या दंगल प्रकरणातून सहा आरोपींची सर्वोच्च न्यायालयाने निर्दोष मुक्तता केलीय. सर्वोच्च न्यायालयाने निर्दोष मुक्तता करतान म्हटलं की, फक्त घटनास्थळी उपस्थित असणं किंवा तिथून अटक होणं हे दंगलीत सहभागी होते असं सिद्ध करण्यासाठी पुरेसं नाही. सर्वोच्च न्यायालयाने या प्रकरणी शुक्रवारी निर्णय दिला.
न्यायमूर्ती पीएस नरसिम्हा आणि न्यायमूर्ती मनोज मिश्रा यांच्या पीठाने गुजरात उच्च न्यायालयाचा २०१६ चा निर्णय रद्द ठरवला. गोध्रा हत्याकांडानंतर २००२ मध्ये झालेल्या दंगल प्रकरणी सहा जणांची निर्दोष मुक्तता करण्यात आली होती. हायकोर्टाने हा निर्णय रद्द ठरवून त्यांना दोषी ठरवलं होतं. आता उच्च न्यायालयाचा निर्णय सर्वोच्च न्यायालयानेच रद्द केला.
सर्वोच्च न्यायालयाने म्हटलं की, फक्त घटनास्थळी असणं किंवा तिथून अटक होणं हे दंगलीत सहभागी असल्याचं सिद्ध करण्यास पुरेसं नाही. एक हजार पेक्षा जास्त लोकांच्या बेकायदेशीर गर्दीचा ते भाग होते असं म्हणता येणार नाही. धीरूभाई लालभाई चौहान यांच्यासह पाच जणांना एक वर्षांच्या तुरुंगवासाची शिक्षा सुनावली होती. वडोद गावात एक कब्रस्तान आणि मशिदीला घेरण्यात आलं होतं. त्यावेळी सहा जणांना घटनास्थळावरून अटक करण्यात आली होती.
कनिष्ठ न्यायालयाने या प्रकरणी १९ जणांची निर्दोष मुक्तता केली होती. पण उच्च न्यायालयाने ६ जणांना दोषी ठरवलं होतं. एका आरोपीचा दरम्यानच्या काळात मृत्यू झाला. सर्वोच्च न्यायालयाने कनिष्ठ न्यायालयाचा निर्णय कायम ठेवत सहा जणांना निर्दोष ठरवलं. अटक केलेल्यांकडे कोणतीही शस्त्रे किंवा विध्वंसक साहित्य आढळलं नव्हतं असंही सुप्रीम कोर्टाने म्हटलं.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
