हवालदाराचा धक्कादायक पराक्रम !
लाच घेतल्यावरही पुन्हा वाळू माफियाला मदत, अखेर बेड्या ठोकल्या
बीड : खरा पंचनामा
एका पोलीस हवालदाराचा पराक्रम पुन्हा एकदा चर्चेत आला आहे. ऑक्टोबर २०२४ मध्ये लाच घेताना रंगेहाथ पकडला गेलेला हा हवालदार, निलंबन संपून पुन्हा सेवेत रुजू होताच पुन्हा एकदा वाळू माफियाला मदतीचा हात देताना आढळून आला आहे. या धक्कादायक प्रकारामुळे बीड पोलीस दलाची विश्वासार्हता पुन्हा एकदा प्रश्नाच्या भोवऱ्यात सापडली आहे.
आरोपी हवालदाराचे नाव रामप्रसाद शिवनाथ कडूळे (वय ३६) असे असून, तो सध्या पोलिस मुख्यालयात कार्यरत आहे. त्याने ऑक्टोबर २०२४ मध्ये जालना लाचलुचपत प्रतिबंधक विभागाच्या कारवाईत, वाळूने भरलेले ट्रॅक्टर सोडण्यासाठी ५ हजारांची लाच घेताना पकड देण्यात आली होती. त्या प्रकरणात निलंबित झालेल्या कडूळेची सेवेत पुनर्रजूवात झाल्यानंतरची वागणूक अधिकच संशयास्पद ठरली.
७ एप्रिल २०२५ रोजी रात्री ९ वाजता, नाथापूर शिवारातील सिंदफना नदीपात्रातून अवैध वाळू उपसा सुरू असल्याची माहिती परिविक्षाधीन उपअधीक्षक पूजा पवार यांना मिळाली. त्यांनी तातडीने पथक पाठवून कारवाई केली. यात एक जेसीबी आणि चालक पकडण्यात आला, पण इतर चार जण फरार झाले. फरार आरोपींपैकी गोरख दिलीप काळे या वाळू माफियाचा यात समावेश होता.
पिंपळनेर पोलिसांनी तपास पुढे नेला असता, गोरख काळे याला पकडण्यात आले. त्याचा मोबाईल तपासताना त्यामध्ये हवालदार कडूळे आणि काळे यांच्यातील संवादाची कॉल रेकॉर्डिंग सापडली. यामधून स्पष्ट झाले की कडूळे याने काळेला पळून जाण्यासाठी मदत केली होती.
या कॉल रेकॉर्डिंगचे पुरावे उपअधीक्षक पूजा पवार यांनी अपर पोलीस अधीक्षक सचिन पांडकर यांच्यामार्फत पोलिस अधीक्षक नवनीत काँवत यांना सादर केले. वरिष्ठांच्या परवानगीनंतर शनिवारी कडूळे याला सह-आरोपी म्हणून अटक करण्यात आली. आता त्याचे पुन्हा एकदा निलंबन होण्याची प्रक्रिया सुरू आहे.
या प्रकारामुळे बीड पोलिस दलाची प्रतिमा पुन्हा एकदा मलीन झाली आहे. सार्वजनिक ठिकाणी कायदा रक्षकच जर कायदा मोडत असतील, तर सामान्य नागरिकांचा पोलिसांवरील विश्वास उडण्याचा धोका आहे. याप्रकरणी कडूळे याच्यावर कठोर कारवाईची मागणी नागरिकांकडून होत आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
