'एक फुल दो माली' प्रकारणातून कुपवाडच्या तरुणाचा खून!
दोघांना अटक : एलसीबी, कुपवाड पोलिसांची कारवाई
सांगली : खरा पंचनामा
कुपवाड येथील बजरंगनगर येथे शुक्रवारी रात्री तरुणाचा झालेला खून 'एक फुल दो माली' प्रकरणातून झाल्याचे स्पष्ट झाले आहे. याप्रकरणी एलसीबीने एका संशयिताला अटक केली असून एका अल्पवयीन मुलाला ताब्यात घेतल्याची माहिती एलसीबीचे वरिष्ठ पोलीस निरीक्षक सतिश शिंदे यांनी दिली. प्रेम प्रकरणातून खून करणाऱ्या एकाला कुपवाड पोलिसांनी अटक केल्याचे कुपवाडचे प्रभारी सहायक पोलीस निरीक्षक दीपक भांडवलकर यांनी सांगितले.
साहिल उर्फ सुमित मधुकर खिलारी, (वय २४, रा. मुळ बुलढाणा, सध्या रा. बामणोली, कुपवाड) याला एलसीबीने अटक केली तर सोन्या उर्फ अथर्व किशोर शिंदे (वय २०, रा. बामणोली कुपवाड) याला कुपवाड पोलिसांनी अटक केली आहे. शुक्रवारी रात्री दहापूर्वी उमेश मच्छिन्द्र पाटील (वय 20, रा. कुपवाड) याचा डोक्यात रॉड घालून खून करण्यात आला होता. यातील संशयितांना पकडण्यासाठी निरीक्षक शिंदे यांनी सहायक निरीक्षक पंकज पवार यांचे तसेच कुपवाडचे सहायक निरीक्षक दीपक भांडवलकर यांची दोन पथके तयार केली होती.
एलसीबीच्या पथकातील सागर लवटे यांना या खुनात साहिल खिलारी याचा सहभाग असल्याची तसेच तो कुपवाड येथील वन विभाग कार्यालय रस्ता परिसरातील एका सर्व्हिसिंग सेंटरजवळ थांबल्याची माहिती मिळाली. पथकाने तेथे जाऊन साहिल याच्यासह एका अल्पवयीन मुलाला ताब्यात घेतले. त्यांच्याकडे चौकशी केल्यावर त्यांनी सोन्या शिंदे याच्या सांगण्यावरून उमेश याच्यावर हल्ला केल्याची कबुली दिली. तर भांडवलकर यांच्या पथकाला सोन्या शिंदे कवलापूर विमानतळ परिसरात थांबल्याची माहिती मिळाली. पथकाने त्याला तेथून ताब्यात घेतले. त्याच्याकडे कसून चौकशी केल्यावर त्याने खुनाची कबुली दिली.
मृत उमेश पाटील आणि मुख्य संशयित सोन्या शिंदे एकाच कंपनीत काम करत होते. त्यांचे एकाच महिलेवर प्रेम होते. त्या प्रेमाच्या त्रिकोणातून सोन्याने अन्य दोघांच्या मदतीने उमेश याचा खून केल्याचे सहायक निरीक्षक भांडवलकर यांनी सांगितले.
एलसीबीचे वरिष्ठ पोलीस निरीक्षक सतिश शिंदे यांच्या मार्गदर्शनाखाली कुपवाडचे सहायक निरीक्षक दीपक भांडवलकर, एलसीबीचे सहायक निरीक्षक पंकज पवार, सहायक निरीक्षक नितीन सावंत, कुपवाडचे उपनिरीक्षक, विश्वजीत गाढवे, एलसीबीचे सतिश माने, सागर लवटे, अनिल कोळेकर, नागेश खरात, अमर नरळे, सागर टिंगरे, महादेव नागणे, संदिप गुरव, मछिंद्र बर्डे, संदिप नलावडे, उदय माळी, अमिरशहा फकीर, केरबा चव्हाण, विक्रम खोत, एम.आय.डी.सी. कुपवाड पोलीस ठाणेकडील संदीप पाटील, गजानन जाधव, प्रविण मोहिते, अविनाश पाटील, संदीप घस्ते, वसंत कांबळे, सायबर पोलीस ठाणेकडील करण परदेशी, अजय पाटील, अभिजित पाटील यांच्या पथकाने ही कारवाई केली.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
