मारहाण करून महिलेचे दागिने लुटणाऱ्याला अटक
सांगली एलसीबीची कारवाई
सांगली : खरा पंचनामा
जत तालुक्यातील हराळे येथे शेळ्या चरायला जाणाऱ्या महिलेला शेतात ओढून नेऊन तिला मारहाण करून दागिने लुटणाऱ्या एकाला अटक करण्यात आली. त्याच्याकडून 70 हजारांचे दागिने जप्त करण्यात आल्याची माहिती एलसीबीचे वरिष्ठ पोलीस निरीक्षक सतिश शिंदे यांनी दिली.
आप्पासो बाळु माळी (वय ४५, रा. लकडे प्लॉट, मंगसुळी रोड, बेडग, ता. मिरज) असे अटक केलेल्याचे नाव आहे. दि. 30 जून रोजी सकाळी हराळे येथे आरती पांढरे शेळ्या चरायला नेत होत्या. त्यावेळी अज्ञाताने त्यांना शेतात ओढून मारहाण करत त्यांच्याकडील दागिने जबरदस्तीने काढून नेले होते. याप्रकरणी जत पोलीस ठाण्यात गुन्हा दाखल करण्यात आला आहे. यातील चोरट्याला पकडण्यासाठी निरीक्षक शिंदे यांनी सहायक निरीक्षक पंकज पवार यांचे पथक तयार केले होते. पथकातील संदीप नलवडे यांना मिरज ते बेडग रस्त्यावरील एका पुलाखाली माळी चोरीचे दागिने विक्री करण्यासाठी येणार असल्याची माहिती मिळाली.
पथकाने तेथे सापळा रचून माळी याला ताब्यात घेतले. त्याच्याकडील दागिन्याबाबत चौकशी केल्यावर त्याने हराळे येथे महिलेला मारहाण करून दागिने लंपास केल्याची कबुली दिली. दागिने जप्त करून त्याला अटक करण्यात आली. त्याला जत पोलिसांच्या ताब्यात देण्यात आले आहे.
एलसीबीचे वरिष्ठ पोलीस निरीक्षक सतिश शिंदे यांच्या मार्गदर्शनाखाली सहायक निरीक्षक पंकज पवार, संदीप नलावडे, सोमनाथ गुंडे, नागेश खरात, अमर नरळे, अमीरशा फकीर, सागर लवटे, संदीप गुरव, उदयसिंह माळी, प्रकाश पाटील, केरुबा चव्हाण, अभिजीत ठाणेकर, सायबरकडील अभिजीत पाटील, अजय पाटील, करण परदेशी यांच्या पथकाने ही कारवाई केली.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
