मिरजेत गांजा विक्रीसाठी आलेली दोन अल्पवयीन मुले ताब्यात
1.20 लाखांचा मुद्देमाल जप्त : महात्मा गांधी चौक पोलिसांची कारवाई
मिरज : खरा पंचनामा
मिरजेतील आंबेडकर उद्यानजवळ गांजा विक्री करण्यासाठी आलेल्या दोन अल्पवयीन मुलांना ताब्यात घेण्यात आले. त्यांच्याकडून एक मोपेड, 2 किलो गांजा असा 1.20 लाखांचा मुद्देमाल जप्त करण्यात आल्याची माहिती महात्मा गांधी चौक पोलीस ठाण्याचे प्रभारी सहायक निरीक्षक संदीप शिंदे यांनी दिली.
'नशामुक्त भारत अभियानां'तर्गत अंमली पदार्थांची विक्री, तस्करी, साठा करणाऱ्यांवर कारवाई करण्याच्या सूचना सहायक निरीक्षक शिंदे यांनी गुन्हे प्रकटीकरण शाखेला दिल्या होत्या. त्यानुसार पथक शहरात गस्त घालत होते. पथकाला दोघेजण आंबेडकर उद्यानजवळ गांजा विक्रीसाठी येणार असल्याची माहिती मिळाली.
पथकाने तेथे सापळा रचला. दोघेजण मोपेडवरून तेथे आले. त्यांच्या हालचाली संशयास्पद वाटल्याने त्यांना ताब्यात घेतले. मोपेडच्या डिकीची तपासणी केल्यावर त्यात दोन किलो गांजा सापडला. दोघेही अल्पवयीन असल्यामुळे मोपेड, गांजा जप्त करण्यात आला.
महात्मा गांधी चौक पोलीस ठाण्याचे प्रभारी सहायक निरीक्षक संदीप शिंदे यांच्या मार्गदर्शनाखाली उपनिरीक्षक संदिप गुरव, सहायक पोलीस उपनिरीक्षक संभाजी गायकवाड, नानासाहेब चंदनशिवे, विनोद चव्हाण, सुनिल माने, विजय शेरेकर, अजितसिंग कोळेकर, मोहसिन टिनमेकर, सुनिल कांबळे यांच्या पथकाने ही कारवाई केली.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
