गुन्हे तपासविषयक प्रशिक्षणामुळे दोषसिद्धीचे प्रमाण वाढेल : पोलीस अधीक्षक संदीप घुगे
तुरची पोलीस प्रशिक्षण केंद्रात ४७१ पदवीधर अंमलदारांच्या गुन्हे तपासविषयक प्रशिक्षणाचा समारोप
तासगाव : खरा पंचनामा
तंत्रज्ञानातील प्रगतीमुळे सायबर क्राईम, आर्थिक गुन्ह्यांचे स्वरुप क्लीष्ट असल्याने अशा गुन्ह्यांची शास्त्रशुद्धपणे उकल होवून त्यामध्ये दोषसिद्धीचे प्रमाण वाढण्यास गुन्हे तपास विषयक प्रशिक्षणात आत्मसात केलेल्या ज्ञानाचा प्रशिक्षणार्थीना प्रत्यक्षात गुन्ह्याच्या तपासावेळी निश्चितच फायदा होणार आहे. तसेच काहीवेळा केवळ गुन्हे तपासातील त्रुटींमुळे व पुराव्याअभावी आरोपी निर्दोष सुटतात, अशावेळी दोषसिद्धीकरीता या प्रशिक्षणातील ज्ञानाचा नक्कीच उपयोग होईल व त्याद्वारे, गुन्ह्यातील दोषसिद्धत्व होवून अन्यायग्रस्त पिडीतास न्याय मिळवून दिल्याचा आनंद फार मोठा असल्याचे मत सांगलीचे पोलीस अधीक्षक संदीप घुगे यांनी व्यक्त केले.
तुरची येथे पोलीस प्रशिक्षण केंद्रात राज्य पोलीस दलातील विविध घटकातील ०७ वर्षे सेवा पुर्ण झालेल्या ४७१ पदवीधर पोलीस अंमलदार यांचे गुन्हे तपासविषयक प्रशिक्षणाचा समारोप झाला. या कार्यक्रमात प्रमुख पाहुणे म्हणून पोलीस अधीक्षक संदीप घुगे उपस्थित होते. त्यावेळी ते बोलत होते. ते म्हणाले, हे प्रशिक्षण घेतलेले सर्व पदवीधर पोलीस अंमलदार त्यांचेकडे सोपविलेल्या कोणत्याही गुन्ह्यांचा तपास बिनचुक व शास्त्रशुद्ध पद्धतीने करुन त्यामध्ये दोषसिद्धत्वाचे प्रमाण वाढवून त्याद्वारे समाजातील प्रत्येक घटकाला न्याय मिळवून देण्याचा प्रयत्न करतील अशी आशा व्यक्त करुन प्रशिक्षणार्थीना शुभेच्छा दिल्या.
प्रशिक्षण केंद्राचे प्राचार्य धीरज पाटील यांनी प्रास्ताविक केले. त्यांनी गुन्हे तपास विषयक प्रशिक्षणाच्या या पहिल्या सत्रामध्ये राज्यातील विविध घटकातून उपस्थित राहिलेले सर्व पात्र पदवीधर पोलीस अंमलदार हे आता सर्व प्रकारच्या आव्हानात्मक व गुंतागुंतीच्या गुन्ह्यांचा शास्त्रोक्त तपास व उकल करणेकरिता सर्वार्थाने सज्ज झाले असून, या प्रशिक्षणाच्या मूळ उद्देशाला अनुरूप अशा पद्धतीने नुकत्याच संमत झालेल्या भारतीय न्याय संहिता, भारतीय नागरिक सुरक्षा संहिता व भारतीय साक्ष संहिता यांचे अद्ययावत व सखोल ज्ञान या पात्र तपासी अंमलदारांना देण्यात आले आहे. या कायद्यांच्या अंमलबजावणीत हे सर्वजण महत्वपूर्ण भूमिका बजावतील अशी खात्री बाळगून, हे प्रशिक्षण यशस्वीरित्या पूर्ण केल्यामुळे यातील ज्ञानाचा वापर करून सर्वजण तपासी अंमलदाराची भूमिका बजावताना उत्कृष्ट कामगिरी बजावतील असे मत व्यक्त केले.
प्रशिक्षणासाठी ४७१ पदवीधर पोलीस अंमलदार हे कोल्हापूर, सांगली, सातारा, सिंधुदुर्ग, रत्नागिरी, रायगड, धाराशिव, लातूर, बीड, पालघर, ठाणे ग्रामीण, पुणे ग्रामीण, सोलापूर ग्रामीण आणि लोहमार्ग-मुंबई लोहमार्ग-पुणे अशा एकूण १५ पोलीस घटकांमधून आलेले होते. या ४ आठवड्यांच्या प्रशिक्षण कालावधीत त्यांना गुन्हे तपासाचे अनुषंगाने, सुधारित भारतीय न्याय संहिता, भारतीय नागरिक सुरक्षा संहिता आणि भारतीय साक्ष संहिता यांचे प्रशिक्षण देण्यात आले. तसेच किरकोळ कायदे यामधील महाराष्ट्र पोलीस अधिनियम दारूबंदी अधिनियम, जुगार प्रतिबंधक अधिनियम, मोटर वाहन कायदा, प्राण्यांना निर्दयतेने वागण्यास प्रतिबंध करणारा अधिनियम, JJ Act, इत्यादी कायदे आणि पोलीस स्टेशनला एखादा गुन्हा दाखल झाल्यानंतर त्याचा F.I.R., घटनास्थळ पंचनामा, पुरावे गुळा करणे, जबाब घेणे, आरोपी अटक करताना घ्यावयाची दक्षता, आरोपीची विचारपुस, तंत्र, पोलीस स्टेशनला दाखल होणारे अकस्मात जळीत, मोटर अपघाताचे गुन्हे, चोरीचे गुन्हे, अंगुली मुद्रा, सायबर गुन्हे या विषयांचे सखोल ज्ञान देण्यांत आले आहे.
प्रशिक्षणाअंती, घेण्यात आलेल्या परिक्षेमध्ये ४६९ प्रशिक्षणार्थी पदवीधर पोलीस अंमलदार हे उत्तीर्ण झाले आहेत. त्यातील विशेष प्राविण्य मिळवलेल्या उत्तीर्ण प्रशिक्षणार्थीना अधीक्षक घुगे यांच्याहस्ते प्रशस्तीपत्र व सन्मानचिन्ह देवून गौरविणेत आले. सूत्रसंचालन सहायक पोलीस निरीक्षक एकता पवार यांनी केले. पोलीस निरीक्षक हणमंत वेताळ यांनी आभार मानले.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
