भाजप कार्यकर्त्याच्या घरात घुसणे महागात पडले, निलेश राणे यांच्यासह चौघावर गुन्हा
मालवण : खरा पंचनामा
मालवण नगरपरिषद निवडणुकीच्या पार्श्वभूमीवर राजकीय वातावरण तापले असताना शिवसेना शिंदे गटाचे आमदार निलेश राणे यांना मोठा धक्का बसला आहे. काही दिवसांपूर्वी आमदार निलेश राणे यांनी भाजप कार्यकर्त्याच्या घरात घुसून पैशांची बॅग शोधून काढली होती.
संबंधित पैसा बेहिशोबी आहे का? हे तपासण्याची मागणी देखील त्यांनी केली होती. दरम्यान, भाजप कार्यकर्त्याच्या घरात घुसणे निलेश राणे यांच्या अंगलट आलंय. कारण पोलिसांनी या प्रकरणात निलेश राणेंवर गुन्हा दाखल केलाय. या प्रकरणामुळे मालवणच्या राजकीय वर्तुळात प्रचंड खळबळ उडाली आहे.
मालवण नगरपालिका काबीज करण्यासाठी भाजपकडून जोरदार तयारी सुरू आहे. याच दरम्यान, गुरुवारी आमदार निलेश राणे काही कार्यकर्त्यांसह भाजप पदाधिकारी विजय केनवडेकर यांच्या घरी अचानक पोहोचले. त्यांच्या अनपेक्षित आगमनामुळे घरातील कार्यकर्त्यांमध्ये गोंधळ उडाला. घरात जाण्यापूर्वी राणे म्हणाले, "मी कुणाच्या बेडरूममध्ये जाणार नाही, जे आत आहे ते बाहेर काढा."
तथापि, कार्यकर्त्यांनी त्यांना आत नेल्यानंतर बेडरूममध्ये मोठ्या रकमेची पैशांनी भरलेली बॅग आढळल्याचा दावा करण्यात आला. पाचशे रुपयांच्या नोटांचे बंडल बॅगेत दिसत असल्याचे व्हिडिओमध्येही दिसत असल्याचा दावा राणेंनी केला. या घटनेने निवडणूक परिसरात मोठी चर्चा सुरू झाली.
या घटनेनंतर भाजप पदाधिकारी विजय केनवडेकर यांनी मालवण पोलीस ठाण्यात आमदार राणे आणि त्यांच्यासोबत असलेल्या व्यक्तींविरोधात तक्रार दाखल केली. त्यानुसार खालील कलमांनुसार गुन्हा नोंदविण्यात आला आहे:
189(1) - बेकायदेशीर जमाव
189(2) - सार्वजनिक शांतता भंग
329 (4) - चोरीच्या उद्देशाने घरात प्रवेश
356(2) - मानहानी
यामुळे या प्रकरणाचे गांभीर्य आणखी वाढले असून राणेंसह चौघांवर कारवाईची प्रक्रिया सुरू झाली आहे.
ज्यांच्या घरी ही रोकड सापडल्याचा दावा केला जात आहे, ते विजय केनवडेकर भाजपचे अधिकृत पदाधिकारी आहेत. राणेंनी माध्यमांसमोर केनवडेकर यांचा भाजप प्रदेशाध्यक्ष रवींद्र चव्हाण यांच्यासह असलेला फोटोही प्रदर्शित केला. त्यानंतर त्यांनी तातडीने स्थानिक पोलीस आणि निवडणूक अधिकाऱ्यांना बोलावून पैसे जप्त करण्याची मागणी केली. राणेंचा दावा आहे की, "ही एकच बॅग नाही. घरात अजून पैसे लपवले आहेत."
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
