राज्याच्या मुख्य सचिवपदी राजेश अगरवाल
मुंबई : खरा पंचनामा
राज्याच्या पहिल्या महिला मुख्य सचिव होण्याचा मान मिळालेल्या सुजाता सौनिक सेवानिवृत्त झाल्यानंतर त्यांच्या जागी महसूल विभागाच्या अतिरिक्त मुख्य सचिवपदी कार्यरत असलेले ज्येष्ठ सनदी अधिकारी राजेशकुमार मीना यांची जून 2025 मध्ये राज्याचे नवे मुख्य सचिव म्हणून नियुक्ती करण्यात आली होती.
मात्र आता राजेश कुमार मीना हे 30 नोव्हेंबर रोजी निवृत्त होणार आहेत. त्यामुळे आता त्यांच्या जागी राजेश अगरवाल हे राज्याच्या मुख्य सचिव पदाची जबाबदारी सांभाळताना दिसणार आहेत.
सुजाता सौनिक सेवानिवृत्त झाल्यानंतर ज्येष्ठतेनुसार राजेशकुमार मीना यांनी 30 जून 2025 पासून राज्याचे मुख्य सचिव म्हणून पदभार सांभाळला. 1988 च्या तुकडीचे सनदी अधिकारी असलेले राजेशकुमार मीना हे ऑगस्ट 2025 मध्ये सेवानिवृत्त होणार होते. त्यामुळे मुख्य सचिव पदासाठी त्यांच्याकडे जुलै आणि ऑगस्ट या जेमतेम दोन महिन्यांचाच कालावधी होता. मात्र राजेशकुमरा मीना यांना तीन महिन्यांची मुदतवाढ देण्यात आली होती. मात्र आता राजेश कुमार मीना हे 30 नोव्हेंबर रोजी निवृत्त होत आहेत. त्यामुळे त्यांच्या जागी राजेश अगरवाल हे राज्याचे नवे मुख्य सचिव म्हणून पदभार स्वीकारणार आहेत.
राजेश अगरवाल हे महाराष्ट्र कॅडर 1989 बॅचचे सनदी अधिकारी आहेत. त्यांनी आयआयटी दिल्ली येथून कॉम्प्युटर सायन्समधून बी टेक ही पदवी घतेली आहे. त्यानंतर त्यांनी अकोला आणि जळगाव येथे जिल्हाधिकारी, बृहन्मुंबई महानगरपालिकेत उपायुक्त, महाराष्ट्र वित्त आणि आयटी विभागांमध्ये प्रमुख भूमिका, केंद्रात आधार, जनधन, डिजीलॉकर आणि सामाजिक न्याय उपक्रमांवर काम केले आहे. अलीकडील राजेश अगरवाल यांनी केंद्रात अपंग व्यक्ती सक्षमीकरण विभागात सचिव म्हणून काम केले आहे. डिजिटल प्रशासन कौशल्य, प्रशासकीय कौशल्य आणि सुधारणा-केंद्रित नेतृत्वासाठी ओळखले जाणारे राजेश अगरवाल हे 1 डिसेंबर 2025 पासून महाराष्ट्राचे मुख्य सचिव म्हणून पदभार स्वीकारणार आहेत.
दरम्यान, सुजाता सौनिक सेवानिवृत्त होणार होत्या, तेव्हा राजेशकुमार मीना यांच्यासोबतच राज्याच्या मुख्य सचिवपदासाठी गृह विभागाचे अप्पर मुख्य सचिव इकबालसिंह चहल, मुंबई महापालिकेचे आयुक्त भूषण गगराणी, ओ. पी. गुप्ता आणि दीपक कपूर हेदेखील शर्यतीत होते. पण, प्रशासनात राजेशकुमार मीना हे सर्वात ज्येष्ठ असल्याने राज्याच्या मुख्य सचिव पदासाठी सरकारकडून त्यांच्या नावालाच अधिक पसंती दिली होती. मात्र आता राजेश अगरवाल यांचा कार्यकाळ 15 महिन्यांचा असणार आहे. त्यामुळे आता पुन्हा एकदा इकबालसिंह चहल, भूषण गगराणी, ओ. पी. गुप्ता आणि दीपक कपूर यांची संधी हुकली आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
