अजितदादांचं निधन, पुणे आज-उद्या बंद
मनपा आयुक्तांचा मोठा निर्णय
पुणे : खरा पंचनामा
राज्याचे उपमुख्यमंत्री अजित पवार यांचं विमान अपघातात निधन झालं आहे. आज बारामतीत राजकीय सभेसाठी जात असताना त्यांच्या विमानाचा अपघात झाला. या घटनेनंतर राज्यासह देशभरात हळहळ व्यक्त केली जाते आहे. महत्त्वाचे म्हणजे अजित पवार यांच्या निधनानंतर दोन दिवस पुणे बंद ठेवण्याचा निर्णय घेण्यात आला आहे.
मिळालेल्या माहितीनुसार, महानगर पालिका आयुक्तांनी हा निर्णय जाहीर केला आहे. त्यानुसार आज आणि उद्या पुणे बंद राहणार असल्याचं त्यांनी सांगितलं. याबरोबरच मार्केट यार्ड देखील बंद राहणार असल्याची माहिती त्यांनी दिली आहे. याशिवाय आज बारामतीदेखील बंद ठेवण्यात आली आहे. व्यापाऱ्यांनी सर्व आस्थापना बंद ठेवल्या आहेत. तसेच लोकांनी पुण्यश्लोक आहिल्यादेवी होळकर शासकीय वैद्यकीय महाविद्यालयाकडे धाव घेतली आहे.
आज सकाळी बारामती विमानतळावर विमानाचे लँडिंग करताना झालेल्या अपघातात विमानातील सर्व जणांचा मृत्यू झाल्याचं सांगण्यात येत आहे. विमान लँड करण्याचा प्रयत्न करत असताना वैमानिकाला धावपट्टीचा अंदाज न आल्यामुळे या विमानाचा अपघात झाल्याची प्राथमिक माहिती आहे.
अजित पवार आज तालुका पंचायत समिती व जिल्हा परिषदेच्या निवडणुकीच्या प्रचारासाठी बारामती तालुक्यात सभा घेणार होते. त्यासाठी ते मुंबईहून बारामतीला विमानाने निघाले होते. मात्र बारामती विमानतळावर त्यांचे विमान अपघातग्रस्त झाल्याने या त्यांचं दुर्दैवी निधन झालं.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
