सांगलीत तरुणाचा चाकूने वार करत खून : एकाला अटक
मावा घेण्याच्या कारणावरून वादातून तिघांचे कृत्य
सांगली : खरा पंचनामा
शहरातील माकडवाले गल्ली येथील स्मशान भूमिजवळ एका तरुणाचा चाकूने वार करत तसेच दगडाने मारहाण करून खून करण्यात आला. रविवारी दुपारी ही घटना घडली होती. मारहाणीत जखमी झालेल्या तरुणाचा सोमवारी उपचार सुरु असताना मृत्यू झाला. याप्रकरणी एकाला अटक करण्यात आली असून दोघांचा शोध सुरु आहे. याबाबत रविवारी विश्रामबाग पोलीस ठाण्यात खुनाच्या प्रयत्नाचा गुन्हा दाखल करण्यात आला होता.
सुरज रामा पवार ऊर्फ बिल्ला (रा. कुची कोरवी कमानीजवळ वडर गल्ली उत्तर शिवाजीनगर सांगली), कुणाल तातोबा जाधव (रा. कुची कोरवी कमानीजवळ वडर गल्ली उत्तर शिवाजीनगर), चंदु नाईक (पुर्ण नाव नाही) अशी संशयितांची नावे आहेत. यातील कुणाल जाधव याला पोलिसांनी अटक केली आहे. नारायण सुरेश पवार (वय ३०) असे मृत तरुणाचे नाव आहे. तर यामध्ये त्याचा मित्र विकी पवार (रा. कुची कोरवी कमानीजवळ, वडर गल्ली, सांगली) जखमी झाला आहे.
दोन दिवसापूर्वी मृत नारायण याचा संशयितांशी मावा घेण्यावरून वाद झाला होता. त्याचा राग तिघांच्या मनात होता. रविवारी दुपारी नारायण आणि त्याचा मित्र माकडवाले गल्ली येथील स्मशान भूमिजवळ थांबले होते. त्यावेळी तिघे संशयित तेथे आले. त्यांनी दोन दिवसापूर्वी झालेल्या वादाचा जाब विचारत नारायण याच्यावर चाकूने वार केले. तसेच दगडाने मारहाण केली. यावेळी विकी पवार भांडण सोडवण्यास गेला असता त्यालाही मारहाण केली.
त्यानंतर गंभीर जखमी झालेल्या नारायण याला सिव्हिल हॉस्पिटल येथे उपचारासाठी दाखल करण्यात आले. तेथे उपचार सुरु असताना त्याचा सोमवारी मृत्यू झाला. विश्रामबाग पोलीसांनी एकाला अटक केली असून अन्य दोन संशयितांचा शोध सुरु आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
