कोल्हापूरच्या दिग्गज खेडाळूची महाराष्ट्राच्या प्रशासनात पुन्हा एन्ट्री!
मुंबई : खरा पंचनामा
महाराष्ट्राच्या क्रीडा क्षेत्रात मोठं नाव कमावलेले जलतरणपटू वीरधवल खाडे आता पुन्हा एकदा राज्याच्या प्रशासकीय सेवेत परतले आहेत. त्यांच्या क्रीडा क्षेत्रातील उल्लेखनीय कामगिरीसोबतच प्रशासनातील अनुभवाचा विचार करून राज्य सरकारने त्यांना पुन्हा शासन सेवेत घेण्याचा निर्णय घेतला आहे. त्यांच्या विनंतीनंतर त्यांनी पूर्वी दिलेला राजीनामा मागे घेण्यास सरकारने विशेष बाब म्हणून मान्यता दिली आहे.
या संदर्भात नियुक्तीचा अधिकृत शासन आदेश जारी करण्यात आला आहे. मुख्यमंत्री देवेंद्र फडणवीस यांच्या सूचनेनुसार महसूलमंत्री चंद्रकांत बावनकुळे यांनी हा आदेश काढला. त्यामुळे वीरधवल खाडे यांची प्रशासकीय सेवेत पुन्हा एन्ट्री झाली आहे. कोल्हापूरचे मूळ रहिवासी असलेले वीरधवल खाडे यांनी जलतरण क्षेत्रात देशासाठी अनेक पदके जिंकून राज्याचं नाव उज्ज्वल केलं आहे. राष्ट्रीय आणि आंतरराष्ट्रीय स्पर्धांमध्ये त्यांनी उल्लेखनीय कामगिरी करत भारताचं प्रतिनिधित्व केलं. त्यांच्या याच क्रीडा योगदानामुळे ते राज्यभर प्रसिद्ध झाले.
क्रीडा क्षेत्रात यश मिळवल्यानंतर त्यांनी प्रशासकीय सेवेत प्रवेश केला आणि महसूल विभागात तहसीलदार म्हणून जबाबदारी स्वीकारली होती. मात्र काही वैयक्तिक कारणांमुळे त्यांनी आपल्या पदाचा राजीनामा दिला होता. त्यांचा राजीनामा 30 सप्टेंबर 2024 रोजी अधिकृतपणे स्वीकारण्यात आला होता.
यानंतर काही काळानंतर वीरधवल खाडे यांनी पुन्हा प्रशासनात काम करण्याची इच्छा व्यक्त केली. त्यांनी शासनाकडे अर्ज करून आपला राजीनामा मागे घेण्याची विनंती केली होती. त्यांच्या क्रीडा क्षेत्रातील उल्लेखनीय योगदानासोबतच प्रशासनातील अनुभवाचा विचार करून राज्य सरकारने त्यांच्या मागणीला सकारात्मक प्रतिसाद दिला.
सरकारने त्यांच्या प्रकरणाला विशेष बाब म्हणून मान्यता देत त्यांना पुन्हा तहसीलदार पदावर रुजू होण्याची संधी दिली आहे. त्यामुळे क्रीडा आणि प्रशासन या दोन्ही क्षेत्रातील त्यांचा अनुभव राज्याच्या कामकाजासाठी उपयुक्त ठरणार असल्याचे मानले जात आहे.
दरम्यान, वीरधवल खाडे यांना तहसीलदार पदावर पुन्हा नियुक्त करण्यात आले असून पुढील पदस्थापनेचे आदेश मिळेपर्यंत त्यांनी कोकण विभागीय आयुक्त कार्यालयात हजर राहून कामकाज पाहण्याचे निर्देश देण्यात आले आहेत. त्यांच्या पुनर्नियुक्तीमुळे क्रीडा क्षेत्रातील व्यक्तींनाही प्रशासनात संधी मिळू शकते, असा सकारात्मक संदेश राज्यभर गेला आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
