दहा हजारांची लाच घेताना सहायक पोलीस निरीक्षकासह अंमलदार ACBच्या जाळ्यात
छत्रपती संभाजीनगर : खरा पंचनामा
तक्रार अर्जावर कोणतीही कायदेशीर कारवाई न करण्यासाठी ५० हजार रुपयांच्या लाचेची मागणी करून, तडजोडीअंती १० हजार रुपये स्वीकारताना एका सहायक पोलिस निरीक्षकाला आणि पोलिस अंमलदाराला लाचलुचपत प्रतिबंधक विभागाने (एसीबी) रंगेहाथ पकडले.
विशेष म्हणजे, ही कारवाई मुकुंदवाडी पोलिस ठाण्याच्या आवारातच करण्यात आली. या धक्कादायक घटनेमुळे शहर पोलिस दलात कमालीची खळबळ उडाली आहे. संजय नागुसिंग बहुरे (वय ४८, सहायक पोलिस निरीक्षक, रा. मयूरपार्क) आणि गोकुळ अनिलराव खटावकर (वय ४३, पोलिस अंमलदार, रा. पिसादेवी) अशी लाच घेणाऱ्यांची नावे आहेत.
या प्रकरणातील २२ वर्षीय तक्रारदार तरुणाच्या विरोधात मुकुंदवाडी पोलिस ठाण्यात एक तक्रार अर्ज दाखल झाला होता. या अर्जावर कोणतीही कायदेशीर कारवाई न करण्यासाठी आणि गुन्हा दाखल न करण्यासाठी अंमलदार गोकुळ खटावकर याने ५ जून रोजी ५० हजार रुपयांच्या लाचेची मागणी केली होती. मात्र, तक्रारदाराची लाच देण्याची अजिबात इच्छा नसल्याने त्यांनी तत्काळ लाचलुचपत प्रतिबंधक विभागाचे (एसीबी) कार्यालय गाठून याविषयी तक्रार नोंदवली.
तक्रारदाराने दिलेल्या अर्जाच्या अनुषंगाने एसीबीच्या अधिकाऱ्यांनी शुक्रवारी (दि. ५) पंचांसमक्ष लाचेच्या मागणीची पडताळणी केली. त्यावेळी अंमलदार खटावकर याने ५० हजारांच्या लाचेची मागणी करून तडजोडीअंती १० हजार रुपये स्वीकारण्याचे मान्य केले. तसेच सहायक पोलिस निरीक्षक संजय बहुरे याने या भ्रष्टाचारास प्रोत्साहन दिल्याचेही पडताळणीत निष्पन्न झाले. त्यानंतर ठरल्याप्रमाणे मुकुंदवाडी पोलिस ठाण्याच्या इमारतीतच एसीबीने सापळा रचला. तक्रारदाराकडून १० हजार रुपयांची लाच स्वीकारताना खटावकर आणि बहुरे या दोघांनाही एसीबीच्या पथकाने रंगेहाथ ताब्यात घेतले. याप्रकरणी मुकुंदवाडी पोलिस ठाण्यातच गुन्हा दाखल करण्याची प्रक्रिया रात्री उशिरापर्यंत सुरू होती.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
