भाजपने शिवसेनेला करु दिला नाही उमेदवाराचा प्रचार; वाद चव्हाट्यावर
ठाणे : खरा पंचनामा
बदलापूर शहरात लोकसभेसाठी महायुतीचे उमेदवार असलेल्या कपिल पाटील यांच्या प्रचारार्थ सर्व्हसाठी गेलेल्या शिवसेनेच्या पदाधिकारी व कार्यकर्त्यांना भाजपच्या कार्यकर्त्याने रोखल्याची घटना समोर आली आहे.
भाजपचे नगरसेवक असलेल्या प्रभागात शिवसेना शिंदे गटाने सर्व्हे करायचा नाही, महायुती आम्ही मानत नाही, अशा शब्दात भाजप पदाधिकाऱ्याने शिंदे गटाचा सर्व्हे रोखल्याने शहरात महायुतीत चालू असलेले अंतर्गत राजकारण चव्हाट्यावर आले आहे.
शिवसेनेचे पदाधिकारी सुदाम घुगे यांनी पक्षश्रेष्ठी व शिवसेना शहरप्रमुख वामन म्हात्रे यांनी दिलेल्या आदेशानुसार, कपिल पाटील यांच्या प्रचाराचे काम सुरू केले आहे. सुदाम घुगे यांच्या पत्नी व सेनेचे इतर पदाधिकारी हे महायुतीचे उमेदवार कपिल पाटील यांच्या प्रचारार्थ कात्रप परिसरात गेले होते.
या वेळी रहिवासी इमारतीमध्ये मतदारांच्या सर्व्हसाठी गेले असता या कामात भाजपचे माजी नगरसेवक नरहरी पाटील व माजी नगरसेविका प्रमिला पाटील यांचे पुत्र व भाजपचे युवा पदाधिकारी आदित्य पाटील यांनी सर्व्हेचे काम करण्यापासून आपल्याला रोखले असल्याचे घुगे यांनी सांगितले.
यावर घुगे यांनी हे काम महायुतीच्या प्रचारासाठी करत आहोत, तसे आदेशच पक्षश्रेष्ठींनी दिल्याचे सांगितले. यावर आपण महायुतीचे पदाधिकारी असल्याचेही त्यांनी सांगितले. मात्र आदित्य पाटील यांनी कठोर शब्दात घुगे यांना खडे बोल सुनावत आम्ही युती मानत नाही, कात्रप हा प्रभाग भाजपच्या नगरसेवकांचा आहे आणि इथे सर्व्हे आम्हीच करणार असल्याचे सांगितले. या प्रकारामुळे शहरात महायुतीला अंतर्गत राजकारणाने घेरल्याचे दिसून आले. याचा फटका आपसूकच कपिल पाटील यांना बसेल, यांची चर्चा सर्वत्र सुरू आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
