वाळू तस्करांशी साटे - लोटे, निलंबनाच्या कारवाईनंतर गेवराईत पोलीस कर्मचारी 3 दिवसांपासून बेपत्ता!
ठाणे प्रभारीचाही बदलीसाठी अर्ज
बीड : खरा पंचनामा
मस्साजोगचे सरपंच संतोष देशमुख यांच्या हत्येनंतर नवे पोलीस अधीक्षक नवनीत काँवत यांनी संपूर्ण प्रकरणाची सूत्रे हाती घेत अवैध वाळू उपसा करणाऱ्या विरोधात काही दिवसांपूर्वी मोठी कारवाई केली होती.
अवैध वाळू उपसा केल्याच्या प्रकरणात आरोपींची साटे - लोटे करणाऱ्या बीडच्या गेवराई पोलीस ठाण्यातील दोन कर्मचाऱ्यांना निलंबित केल्यानंतर आता त्यातील पोलीस हवालदार अशोक हंबर्डे गेल्या 3 दिवसांपासून बेपत्ता असल्याची माहिती समोर येत आहे. तर दुसरीकडे गेवराई ठाण्याचे पीआय प्रवीण कुमार बांगर यांनी आपल्या बदलीचा अर्ज नवनीत कॉवत यांना दिल्याने मोठी खळबळ उडाली आहे.
दरम्यान, बेपत्ता निलंबित पोलीस कर्मचारी अशोक हंबर्डे यांना एक दिवस आधीच अधीक्षक नवनीत कॉवत यांनी चांगल्या कामासाठी रिवार्ड दिले होते. त्यानंतर दुसऱ्याच दिवशी त्यांचे निलंबन झाले. ज्या कारवाईसाठी हे निलंबन झाले त्यातील वस्तुस्थिती आणि एसपींना दिलेला अहवाल यात फरक असल्याचे सांगण्यात येत आहे.
वाळूचे ट्रॅक्टर पकडून कारवाई न करता सोडून दिलाचा ठपका ठेवत बीडच्या गेवराई पोलीस ठाण्यातील दोन पोलिसांना नवनीत काँवत यांनी निलंबित केले होते. मात्र यातील एक कर्मचारी अशोक हंबर्डे हे 3 दिवसांपासून बेपत्ता असल्याची माहिती समोर येत आहे. अशोक हंबर्डे यांचा फोनही बंद असल्याने कुटुंबीय हवालदिल झाले आहेत.
एकीकडे अवैध वाळू उपसा करणाऱ्या ट्रॅक्टरवर कारवाईचा आदेश असतानाही वाळूसह गाडी ताब्यात न घेता फक्त वाहन ठाण्यात आणून ठेवले आणि गुन्हा दाखल करण्यास देखील विलंब केल्याचा ठपका ठेवत पोलीस अधीक्षकांनी गेवराईतील दोन पोलीस कर्मचाऱ्यांना निलंबित केले होते. अवैध वाळू उपसा केल्याच्या प्रकरणातील आरोपींची साठे लोटे असण्याचा आरोप त्यांच्यावर होता. दरम्यान दुसरीकडे, गेवराई ठाण्याचे पीआय प्रवीण कुमार बांगर यांनी आपली नियंत्रण कक्षात बदली करावी अशा प्रकारचा अर्ज अधीक्षक कॉवत यांना दिला आहे. गेवराई ठाण्यातील पोलीस कर्मचारी अशोक हंबर्डे आणि सहाय्यक फौजदार बलराम सुतार यांच्यावर वाळूच्या पकडलेल्या ट्रॅक्टरवरून कारवाईत दिरंगाई केल्याचा ठपका ठेवला गेला होता. शुक्रवारी या दोघांना निलंबित केले होते.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
