उघड्या घरात चोरी करणाऱ्या तरूणाला चार तासांत अटक
१.०५ लाखांचे दागिने जप्त, विश्रामबाग पोलिसांची कारवाई
सांगली : खरा पंचनामा
शहरातील हनुमाननगर येथील उघड्या घरातून दागिने चोरणाऱ्या तरूणाला अवघ्या चार तासात अटक करण्यात आली. त्याच्याकडून चोरीचे १.०५ लाखांचे दागिने जप्त करण्यात आल्याची माहिती विश्रामबागचे पोलिस निरीक्षक सुधीर भालेराव यांनी दिली.
अजय अनिल वाघमोडे (वय २५, रा. हनुमाननगर, सांगली) असे अटक केलेल्याचे नाव आहे. हनुमाननगर येथील सुमित्रा कोरे यांच्या घराचा दरवाजा शुक्रवारी दुपारी उघडा होता. दुपारी दोन ते चारच्या दरम्यान अज्ञाताने घरात प्रवेश करून लोखंडी कपाटातील सोन्याचे दागिने लंपास केले होते. याप्रकरणी विश्रामबाग पोलिस ठाण्यात गुन्हा दाखल करण्यात आला होता. यातील संशयितांना पकडण्याच्या सूचना निरीक्षक भालेराव यांनी गुन्हे प्रकटीकरण शाखेला दिल्या होत्या.
ही चोरी अजय वाघमोडे याने केल्याची माहिती पथकाला मिळाली. पथकाने त्याच्या घरातून त्याला ताब्यात घेतले. त्याच्याकडे कसून चौकशी केल्यानंतर त्याने चोरीची कबुली दिली. त्याच्याकडून १ लाख ५ हजारांचे सोन्याचे दागिने जप्त करून त्याला अटक करण्यात आली.
विश्रामबागचे पोलिस निरीक्षक सुधीर भालेराव यांच्या मार्गदर्शनाने उपनिरीक्षक प्रवीण कांचन, संदीप माने, बाळू मोरे, प्रमिला शिंदे, यागेश पाटील, काजल चव्हाण आदींच्या पथकाने ही कारवाई केली.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
