कोल्हापूर, सांगली जिल्ह्यातून दुचाकी चोरणाऱ्या सांगलीतील दोघांना अटक
शाहूपुरी पोलिसांनी केली 9 वाहने जप्त : निरीक्षक डोके
कोल्हापूर : खरा पंचनामा
कोल्हापूर शहरासह सांगली जिल्ह्यातून दुचाकी चोरणाऱ्या सांगली जिल्ह्यातील दोघांना अटक करण्यात आली. त्यांच्याकडून 4.50 लाख रुपये किमतीच्या 9 दुचाकी जप्त करण्यात आल्याची माहिती शाहूपुरी पोलीस ठाण्याचे वरिष्ठ पोलीस निरीक्षक संतोष डोके यांनी दिली.
शरद सुभाष टोमके (वय २२, रा. साठे नगर, आष्टा ता. वाळवा), विशाल मधुकर चव्हाण (वय २२, बागणी, ता. वाळवा) अशी अटक केलेल्यांची नावे आहेत. दि. 6 मार्च रोजी आष्टा येथील महावीर आवटी यांची दुचाकी कोल्हापूर मध्यवर्ती बसस्थानक परिसरातून चोरीला गेली होती. याबाबत शाहूपुरी पोलीस ठाण्यात नोंद करण्यात आली होती. यातील चोरट्याना पकडण्याच्या सूचना निरीक्षक डोके यांनी गुन्हे प्रकटीकरणशाखेला दिल्या होत्या.
पथक चोरट्याचा शोध घेत असताना शंभर फुटी रस्ता परिसरात दोघेजण विना क्रमांकाची दुचाकी घेऊन फिरत असल्याचे पथकाला दिसले. पथकाने दोघांना ताब्यात घेऊन कसून चौकशी केल्यावर त्यांनी कोल्हापूर शहर, शिरोली औद्योगिक वसाहत, सांगली जिल्ह्यातील आष्टा, कासेगाव आदी परिसरातून दुचाकी चोरल्याची कबुली दिली. त्यांना अटक करून चोरीच्या 9 दुचाकी जप्त करण्यात आल्या. शाहूपुरीचे वरिष्ठ पोलीस निरीक्षक संतोष डोके यांच्या मार्गदर्शनाने गुन्हे प्रकटीकरण शाखेतील अधिकारी, अंमलदारांनी ही कारवाई केली.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
