प्रशांत कोरटकरच्या पत्नीने कोल्हापूर पोलिसांकडे जमा केला पासपोर्ट
कोल्हापूर : खरा पंचनामा
इतिहास संशोधक इंद्रजीत सावंत यांना धमकावणारा प्रशांत कोरटकर याचा पासपोर्ट त्याच्या पत्नीने शनिवारी (दि. २२) नागपुरात कोल्हापूर पोलिसांकडे जमा केला. यामुळे तो देशाबाहेर पळाला नसल्याचे स्पष्ट झाले. दोन वर्षांपूर्वीचे त्याच्या कौटुंबिक सहलीचे दुबईमधील फोटो व्हायरल झाल्याने तो देशाबाहेर पळाल्याच्या चर्चा सुरू होत्या. याला अखेर पूर्णविराम मिळाला. दरम्यान, चंद्रपूर जिल्ह्यात त्याचा शोध सुरू असल्याची माहिती पोलिसांनी दिली.
छत्रपती शिवाजी महाराज आणि छत्रपती संभाजी महाराज यांच्याबद्दल आक्षेपार्ह वक्तव्य करून इतिहास संशोधक इंद्रजीत सावंत यांना धमकावल्याप्रकरणी प्रशांत कोरटकर याच्यावर जुना राजवाडा पोलिस ठाण्यात गुन्हा दाखल आहे. कोल्हापूर जिल्हा व सत्र न्यायालयाने त्याचा अटकपूर्व जामीनअर्ज रद्द केल्याने जुना राजवाडा पोलिस त्याच्या शोधात आहेत. अटकेच्या भीतीने तो दुबईला पळाल्याची चर्चा शनिवारी सकाळपासून प्रसार माध्यमांमध्ये सुरू होती. दुबईतील त्याचे काही फोटोही व्हायरल झाले होते. यावरून अधिवेशनात विरोधकांनी सरकारला धारेवर धरले.
फिर्यादी सावंत यांनी जुना राजवाडा पोलिसांची भेट घेऊन कोरटकरचा पासपोर्ट जमा करून घेण्यासाठी त्याच्या पत्नीला नोटीस पाठवण्याची विनंती केली. मुख्यमंत्री देवेंद्र फडणवीस यांनाही याबाबत माध्यमांनी प्रश्न विचारले. त्यावर कोरटकर कुठेही गेला तरी पोलिस त्याला पकडतील, असा विश्वास फडणवीस यांनी व्यक्त केला होता. दरम्यान, त्याच्या पत्नीने तपासासाठी नागपुरात असलेल्या कोल्हापूर पोलिसांकडे कोरटकर याचा पासपोर्ट देऊन अफवा आणि चर्चाना पूर्णविराम दिला.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
