मिरजेत गोवा बनावटीच्या दारूसाठ्यासह साडेसहा लाखाचा मुद्देमाल जप्त
उत्पादन शुल्क विभागाची कारवाई; ६० हजारांची दारू जप्त : अधीक्षक पोटे
सांगली : खरा पंचनामा
राज्य उत्पादन शुल्क विभागाच्या पथकाने ६० हजाराच्या गोवा बनावटीच्या दारूसाठ्यासह साडेसहा लाखांचा मुद्देमाल जप्त केला. दारूचा बेकायदेशीर साठा करणाऱ्या चौघांना अटक करण्यात आली आहे. मिरजेतील जवाहर चौक परिसरात ही कारवाई करण्यात आली. यावेळी दारूसाठा, मोबाईल, दारू वाहतूक करणारा ट्रक, एक चारचाकी व दुचाकी असा मुद्देमाल जप्त केल्याची माहिती उत्पादन शुल्कचे अधीक्षक प्रदीप पोटे यांनी दिली.
याप्रकरणी सागर मोहनराव साबळे (बेडग), गणेश संजय शिंदे (सुभाषनगर), मलगोंडा महादगोंडा पाटील (नदीवेस), प्रवीण अशोक पाटील (ढवळी) या चौघांना अटक करण्यात आली आहे. मिरजेतील जवाहर चौक परिसरातील रिकाम्या जागेत गोवा बनावटीचे विदेशी मद्य बेकायदेशीररित्या विक्रीसाठी आणण्यात येणार असल्याची माहिती मिरजेचे निरीक्षक सुपे यांना मिळाली होती. त्यानुसार पथकाने या ठिकाणी सापळा लावला. तेथे असलेला ट्रक (एमएच १० डीटी २६४७), चार चाकी वाहन (एमएच १० एएन ९५१७) व एक दुचाकी (एमएच १० बीडब्ल्यू ९४४७) या वाहनांची तपासणी केली असता त्यात गोवा बनावटीची विदेशी दारू सापडली. दारूसाठा महाराष्ट्र राज्याचा महसूल बुडवून आयात करण्यात आल्याची माहिती उत्पादन शुल्क विभागाने दिली आहे. येथून ६१ हजार २०० रुपये किंमतीचा दारूसाठा, दुचाकी, चार चाकी, ट्रक व मोबाईल असा मुद्देमाल जप्त करण्यात आला आहे.
राज्य उत्पादन शुल्कचे विभागीय उपायुक्त विजय चिंचाळकर, अधीक्षक प्रदीप पोटे यांच्या मार्गदर्शनाने निरीक्षक दीपक सुपे, दुय्यम निरीक्षक अजय लोंढे, लक्ष्मण पवार, जयसिंग खुटावळे, स्वप्नील आटपाडकर, विनायक खांडेकर, हनुमंत निळे, कविता सुपने, शाहीन शेख, स्वप्निल कांबळे यांच्या पथकाने ही कारवाई केली.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
