वारकरी भक्ती आणि योग यांचा संगम असलेला उपक्रम आगळावेगळा ठरेल : उच्च व तंत्र शिक्षण मंत्री चंद्रकांत पाटील
पुणे : खरा पंचनामा
श्री संत ज्ञानेश्वर महाराज आणि संत तुकाराम महाराज यांच्या पालख्या २१ जून रोजी पुणे शहरात मुक्काम करणार असून, योग दिनाचे औचित्य साधून राज्य शासनाच्या पुढाकाराने एक भव्य ‘वारकरी भक्तीयोग उपक्रम’ आयोजित करण्यात आला आहे. या उपक्रमात पाच लाखांहून अधिक वारकरी सहभागी होण्याची अपेक्षा असल्याची माहिती उच्च व तंत्र शिक्षण मंत्री चंद्रकांत पाटील यांनी दिली . या पार्श्वभूमीवर शनिवारी विद्यापीठात या उपक्रमाच्या संदर्भात पूर्वतयारी बैठक पार पडली. या बैठकीला पाटील यांची प्रमुख उपस्थिती होती. यामध्ये ६०० हून अधिक स्वयंसेवक आणि कार्यक्रम अधिकारी सहभागी झाले होते. वारकरी भक्ती आणि योग यांचा संगम असलेला हा उपक्रम पुणे शहराच्या इतिहासात एक आगळावेगळा उपक्रम ठरेल, असा विश्वास पाटील यांनी या बैठकीत व्यक्त केला.
महाराष्ट्र सरकार, सावित्रीबाई फुले पुणे विद्यापीठ, पुणे महानगरपालिका, राष्ट्रीय सेवा योजना, श्रीक्षेत्र आळंदी, श्रीक्षेत्र देहू, विद्यार्थी विकास मंच यांच्या संयुक्त विद्यमाने या उपक्रमाचे आयोजन करण्यात आले आहे. शहरात सुमारे पाच लाख वारकरी आणि तितकेच पुणेकर भजन, कीर्तन, प्रवचन, योगसाधना अशा विविध कार्यक्रमांमध्ये सहभागी होणार आहेत.
आजपर्यंत १६७ महाविद्यालयांतील ५,००० विद्यार्थ्यांनी सहभाग नोंदवला असून उपक्रमाचे सूक्ष्म नियोजन सुरू आहे. या उपक्रमात शहरातील २०० हून अधिक महाविद्यालये, १८ स्वायत्त विद्यापीठे, विविध सामाजिक संस्था, राजकीय पक्ष, आणि गणेश मंडळांचे कार्यकर्ते सहभागी होणार आहेत.
उच्च व तंत्रशिक्षण विभागाचे राज्याचे संचालक डॉ. शैलेंद्र देवळाणकर, उपक्रमाचे संयोजक आणि राष्ट्रीय सेवा योजना राज्य सल्लागार समितीचे सदस्य राजेश पांडे, कुलगुरू डॉ. सुरेश गोसावी, प्र-कुलगुरू डॉ. पराग काळकर, कुलसचिव डॉ. चारुशीला गायके, तसेच विद्यापीठ व्यवस्थापन समितीचे सदस्य रवींद्र शिंगणापूरकर, भाग्यश्री मंठाळकर, सागर वैद्य, डॉ. नितीन घोरपडे, संगीता जगताप आणि एनएसएसचे संचालक डॉ. सदानंद भोसले यांची प्रमुख उपस्थिती होती.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
