सुगंधी तंबाखू, गुटख्याची 'थार'मधून तस्करी करणाऱ्या रत्नागिरीच्या तरुणाला अटक
16.21 लाखांचा मुद्देमाल जप्त : मिरज ग्रामीण पोलिसांची कारवाई
सांगली : खरा पंचनामा
कर्नाटकातून सुगंधी तंबाखू, गुटख्याची थार या आलिशान कारमधून तस्करी करणाऱ्या रत्नागिरी येथील तरुणाला अटक करण्यात आली आहे. त्याच्याकडून विविध कंपन्यांची सुगंधी तंबाखू, गुटखा, कार असा 16.21 लाखांचा मुद्देमाल जप्त करण्यात आला. बेडग येथे मिरज ग्रामीण पोलिसांनी ही कारवाई केली.
संकेत शिवाजी चव्हाण (वय २०, रा. फनसोफ हॉयस्कुल जवळ, रत्नागिरी) असे अटक केलेल्याचे नाव आहे. मिरज ग्रामीण पोलीस ठाण्याच्या हद्दीत बेकायदा सुगंधी तंबाखू, गुटखा याचा साठा, विक्री, तस्करी करणाऱ्यांवर कारवाई करण्याच्या सूचना पोलीस निरीक्षक सिद्ध यांनी गुन्हे प्रकटीकरण शाखेला दिल्या होत्या. त्यानुसार तस्करांचा शोध घेत असताना सहायक उपनिरीक्षक प्रवीण यादव यांना थारमधून सुगंधी तंबाखू, गुटख्याची कर्नाटकातून मिरज मार्गे रत्नागिरी येथे तस्करी होत असल्याची माहिती खबऱ्याद्वारे मिळाली. त्यानुसार पथकाने बेडग येथे सापळा रचला होता.
माहितीप्रमाणे विना क्रमांकाची थार कर्नाटकातून बेडग येथील आडव्या फाट्यावर आल्यावर पथकाने ती अडवली. गाडीची झडती घेतल्यावर त्यामध्ये प्रतिबंधित सुगंधी तंबाखू, गुटखा सापडला. याबाबत थार चालक संकेत चव्हाण याच्याकडे कसून चौकशी केल्यावर त्याने कर्नाटकातून हा माल आणल्याचे सांगून विक्रीसाठी रत्नागिरी येथे नेत असल्याची कबुली दिली. कारसह मुद्देमाल जप्त करून चव्हाण याला अटक करण्यात आली.
मिरज ग्रामीण पोलीस ठाण्याचे प्रभारी पोलीस निरीक्षक अजित सिद्ध यांच्या मार्गदर्शनाखाली सहायक निरीक्षक सुनिल गुरव, उपनिरीक्षक अझर मुलाणी, सहायक उपनिरीक्षक प्रकाश सांळुखे, सहायक उपनिरीक्षक प्रविण यादव, वसंत कांबळे, सागर कोरे, स्वप्नील भोसले यांच्या पथकाने ही कारवाई केली.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
