म्हैसूर येथील एमडी ड्रग्जचा कारखाना उध्वस्त : 390 कोटींचा मुद्देमाल जप्त
मुंबईतील अंमली पदार्थ विरोधी टास्क फोर्सची कर्नाटकात जाऊन कारवाई
मुंबई : खरा पंचनामा
वसई तालुक्यातील कामणगाव येथे एमडी ड्रग्ज निर्मिती कारखान्यावर छापा टाकून चौघांना अटक करण्यात आली होती. त्यांच्याकडील चौकशीनंतर कर्नाटकातील म्हैसूर येथील एमडी ड्रग्जच्या कारखान्यावर छापा टाकून चौघांना अटक करत 381 कोटींचे एमडी ड्रग्ज आणि ते बनवण्यासाठी लागणारे साहित्य असा 390 कोटींचा मुद्देमाल जप्त करण्यात आला. मुंबईतील अंमली पदार्थ विरोधी टास्क फोर्सने कर्नाटकात जाऊन ही धाडसी कारवाई केली.
दि. 24 एप्रिल रोजी टास्क फोर्सने वसई तालुक्यातील कामणगाव येथे एमडी ड्रग्ज निर्मिती करणाऱ्या कारखान्यावर छापा टाकून चौघांना अटक केली होती. त्यावेळी एमडी ड्रग्जसह 8. 04 कोटींचा मुद्देमाल जप्त करण्यात आला होता. याप्रकरणी साकीनाका पोलीस ठाण्यात गुन्हा दाखल करण्यात आला आहे. अटक केलेल्या सलीम इम्तियाज शेख उर्फ सलीम लंगडा (वय 45, रा. बांद्रा पश्चिम, मुंबई) याच्याकडे कसून चौकशी केल्यावर कर्नाटकातील म्हैसूर येथील रिंग रोड परिसरात एमडी ड्रग्ज निर्मितीचा मोठा कारखाना असल्याची माहिती टास्क फोर्सला मिळाली.
त्यानंतर पोलीस निरीक्षक संजय क्षीरसागर यांच्या नेतृत्वाखालील पथकाने दि. 26 जुलै रोजी म्हैसूर येथे छापा टाकला. त्यावेळी चौघांना अटक करत 381 कोटींचे एमडी ड्रग्ज आणि ते बनवण्याचे साहित्य असा 390 कोटींचा मुद्देमाल जप्त केला. याप्रकरणात आणखी काही खळबळजनक मोठी कारवाई होण्याची शक्यता व्यक्त केली जात आहे. या कारवाईमुळे एमडी ड्रग्ज निर्माते आणि तस्कर, विक्रेते यांचे धाबे दणाणले आहेत. यामागील मोठया टोळीचा लवकरच पर्दाफाश होण्याची शक्यता आहे.
परिमंडळ दहाचे पोलीस उपायुक्त दत्ता नलावडे, वरिष्ठ पोलीस निरीक्षक प्रमोद तावडे यांच्या मार्गदर्शनाखाली निरीक्षक संजय क्षीरसागर, सहायक निरीक्षक दयानंद वणवे, उपनिरीक्षक पंकज परदेशी, शशिकांत पाटील, चंद्रकांत पवार, नितीन खैरमोडे, अनिल करांडे यांच्या पथकाने ही कारवाई केली.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
