सांगलीत औषधी गोळ्या नशेसाठी विक्री करणाऱ्या तिघांना अटक
600 गोळया जप्त : एलसीबीची कारवाई
सांगली : खरा पंचनामा
सांगलीतील रेल्वे स्टेशनजवळ नायट्रोव्हेट या औषधी गोळ्यांची नशेसाठी विक्री करण्यासाठी थांबलेल्या तिघांना अटक करण्यात आली. त्यांच्याकडून 600 गोळया जप्त करण्यात आल्या आहेत. त्यांना या गोळया पुरवणारा मुंबई येथील संशयिताचा शोध सुरु असल्याची माहिती एलसीबीचे वरिष्ठ पोलीस निरीक्षक सतिश शिंदे यांनी दिली.
रवि सिद्राम पवार (वय ३६) रोहन साहेबराव पवार (वय २१ दोघेही रा. अच्युतराय कुलकर्णी प्लॉट, माकडवाले गल्ली, सांगली), आर्यन बजरंग कांबळे (वय २२, रा. शांतीनगर, अंगणवाडीजवळ, सांगली) अशी अटक केलेल्यांची नावे आहेत. नशामुक्त भारत अभियानाअंतर्गत अंमली पदार्थांची विक्री, साठा, तस्करी करणाऱ्यांवर कारवाई करण्यासाठी निरीक्षक शिंदे यांनी सहायक निरीक्षक नितीन सावंत यांचे पथक तयार केले होते. पथकाला एकजण सांगली रेल्वे स्टेशनजवळ नायट्रोव्हेटच्या गोळया विक्री करण्यासाठी थांबल्याची माहिती मिळाली.
पथकाने तेथे सापळा रचून रवि पवार याला ताब्यात घेतले. त्याच्याकडील पिशवीची तपासणी केल्यावर त्यात नायट्रोव्हेटच्या गोळ्यांची पाकिटे सापडली. त्याबाबत कसून चौकशी केल्यावर त्याने या गोळया त्याचा नातेवाईक प्रकाश मल्लू पवार (रा. कुर्ला, मुंबई) याच्याकडून विक्रीसाठी आणल्याची तसेच या गोळया पोहचवण्यासाठी आर्यन कांबळे आणि रोहन पवार हे दोघेही कुरियर बॉय म्हूणन काम करत असल्याची कबुली दिली. त्यानंतर या तिघांनाही अटक करून विश्रामबाग पोलीस ठाण्यात गुन्हा दाखल करण्यात आला आहे.
एलसीबीचे वरिष्ठ पोलीस निरीक्षक सतिश शिंदे यांच्या मार्गदर्शनाखाली सहायक निरीक्षक नितीन सावंत, उपनिरीक्षक कुमार पाटील, अन्न व औषध प्रशासनाच्या सहा. आयुक्त जयश्री सवदत्ती, नायब तहसिलदार विनोदकुमार चव्हाण, अनिल ऐनापुरे, आमसिंध्द् खोत, बसवराज सिरगुप्पी, गुंडोपंत दोरकर, बाबासाहेब माने, अमर नरळे, अनंत कुडाळकर, श्रीधर बागडी, सुमित सुर्यवंशी, रोहन घस्ते, ऋतुराज होळकर, सुमित सुर्यवंशी, विनायक सुतार, सोमनाथ पतंगे, चालक शिवाजी शिद, सायबर पोलीस ठाण्यातील अजय पाटील, विवेक सांळुखे, अभिजीत पाटील यांच्या पथकाने ही कारवाई केली.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
