पोस्टल बॅलेटची मतमोजणी पूर्ण झाल्यानंतरच एव्हीएम मशीन मधील मतांची मोजणी!
नवी दिल्ली : खरा पंचनामा
केंद्रीय निवडणूक आयोगाने 24 तासांत दुसरा न महत्वपूर्ण निर्णय घेत मतमोजणी प्रक्रियेत पारदर्शकता आणि शिस्त आणण्यासाठी पावले उचलली आहेत. मतदारयादीतील नावे वगळण्याच्या प्रक्रियेत सुधारणा केल्यानंतर आता आयोगाने मतमोजणीच्या नियमांत बदल करत एक महत्त्वाचा निर्णय जाहीर केला आहे.
नव्या निर्णयानुसार, पोस्टल बॅलेटची मतमोजणी पूर्ण होईपर्यंत इलेक्ट्रॉनिक व्होटिंग मशीनच्या शेवटच्या दुसऱ्या फेरीची मतमोजणी सुरू करता येणार नाही. यापूर्वी EVM ची मतमोजणी पोस्टल बॅलेटची मोजणी पूर्ण होण्याआधी सुरू होऊ शकत होती, ज्यामुळे काही वेळा संभ्रम आणि वाद निर्माण होत होते. या नव्या नियमामुळे अशा तक्रारी आणि आरोप-प्रत्यारोप टाळण्यास मदत होईल.
गेल्या काही निवडणुकांमध्ये पोस्टल बॅलेटच्या मतांची संख्या लक्षणीयरीत्या वाढली आहे. विशेषतः दिव्यांग मतदार आणि 85 वर्षांवरील ज्येष्ठ नागरिकांसाठी घरबसल्या मतदानाची सुविधा उपलब्ध झाल्याने ही वाढ दिसून आली आहे. या पार्श्वभूमीवर, पोस्टल मतांची मोजणी अचूक आणि जलद व्हावी यासाठी आयोगाने नव्या सूचना जारी केल्या आहेत.
मतमोजणी केंद्रांवर अधिक टेबल्स आणि कर्मचारी उपलब्ध करून देण्याचे निर्देश देण्यात आले आहेत. यामुळे पोस्टल मतपत्रिकांची मोजणी वेळेत आणि काटेकोरपणे पूर्ण होईल. या निर्णयामुळे मतमोजणी प्रक्रियेला गती मिळेल आणि अंतिम निकाल जाहीर करण्यास होणारा विलंब कमी होईल.
हा निर्णय निवडणूक प्रक्रियेत पारदर्शकता आणि विश्वासार्हता वाढवण्यासाठी महत्त्वाचा ठरणार आहे. मतमोजणी प्रक्रियेत स्पष्टता आणि शिस्त यामुळे राजकीय पक्ष, उमेदवार आणि मतदारांमध्ये विश्वासाचे वातावरण निर्माण होण्यास मदत होईल. तसेच, मतमोजणीशी संबंधित वाद कमी होण्याची अपेक्षा आहे.
हा निर्णय अशा वेळी घेतला गेला आहे, जेव्हा केंद्रीय निवडणूक आयोगावर विरोधी पक्षांकडून, विशेषतः लोकसभेतील विरोधी पक्षनेते राहुल गांधी यांच्याकडून, सातत्याने टीका होत आहे. आयोगाच्या या पावलामुळे निवडणूक प्रक्रियेची प्रामाणिकता आणि विश्वासार्हता आणखी दृढ होईल, असा विश्वास व्यक्त केला जात आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
