नीलेश घायवळच्या नादात पोलीसच फसले; ते प्रकरण अंगलट येणार?
पुणे : खरा पंचनामा
कुख्यात गुंड नीलेश घायवळला एका 'मकोका' प्रकरणात गुन्ह्यात जामीन देताना न्यायालयाने 30 नोव्हेंबर 2022 रोजी पासपोर्ट न्यायालयात जमा करण्याचा आदेश देण्यात आला होता. मात्र, त्यावेळी घायवळने पासपोर्ट जमा केला नाही; तसंच त्याच्याकडे याबाबत पोलिसांनीही चौकशी केली नाही. या पार्श्वभूमीवर तत्कालीन तपास अधिकाऱ्याची चौकशी केली जाणार असल्याचं पोलीस आयुक्तांनी स्पष्ट केलं आहे.
याबाबतची सविस्तर माहिती अशी की, शहरातील कुख्यात गुंड नीलेश घायवळ याच्या पासपोर्ट प्रकरणात तत्कालीन अहिल्यानगर पोलीस अधीक्षक कार्यालयांतर्गत येणाऱ्या अहिल्यानगर पोलिसांच्या भूमिकेवर पुणे पोलिसांनी संशय व्यक्त केला आहे. तसंच पुणे पोलिसांनी तत्कालीन पोलीस निरीक्षक आणि संबंधित कर्मचाऱ्यांना नोटीस बजावली आहे. या अधिकाऱ्यांना चौकशीसाठी हजर राहण्याचे आदेश देण्यात आले असून पुणे पोलिसांकडून या प्रकरणाची सखोल चौकशी करण्यात येत आहे.
पुण्याचे पोलीस आयुक्त अमितेशकुमार यांनी दिलेल्या माहितीनुसार, घायवळ याने 2019 मध्ये अहिल्यानगर जिल्ह्यातील राहता पत्ता व कागदपत्रांचा आधार घेत पासपोर्ट मिळवला होता. त्यावेळी अहिल्यानगर पोलिसांकडून त्याची पत्ता पडताळणी करण्यात आली होती. परंतु, नीलेश घायवळविरोधात अनेक गंभीर गुन्हे नोंद असतानादेखील पडताळणी अहवाल 'स्वच्छ' दाखवण्यात आला. या प्रकरणाची नोंद पुणे पोलिसांकडे आल्यानंतर पोलिसांनी संबंधित कागदपत्रांचा तपशील मागवून चौकशी सुरू केली होती. तपासादरम्यान अहिल्यानगरमधील विशेष शाखेतील पासपोर्ट विभागात कार्यरत असलेल्या तत्कालीन पोलीस निरीक्षक व कर्मचाऱ्यांना चौकशीसाठी हजर राहण्याची नोटीस देण्यात आली.
दरम्यान, कोथरूड गोळीबार प्रकरणामध्ये आरोपी करण्यात आल्यानंतर नीलेश घायवळच्या पासपोर्टचा प्रश्न उपस्थित झाला. याप्रकरणी त्याला मदत कोणी केली व पोलीस यंत्रणेमधील कोणाच्या संगनमताने पासपोर्ट पडताळणी पार पडली की पासपोर्ट विभागातच त्याने 'सेटिंग' लावले होते, याकडं आता लक्ष लागलं आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
