नगरपालिका निवडणुकीवेळी पोलिसांनी नि:पक्षपणे, सचोटीने कर्तव्य पार पाडावे
कोल्हापूर परीक्षेत्राचे विशेष पोलीस महानिरीक्षक सुनिल फुलारी यांच्या आढावा बैठकीत सूचना
नगरपालिका निवडणुकांसाठी सांगली पोलीस सज्ज
सांगली : खरा पंचनामा
जिल्ह्यातील आठ नगरपालिकांच्या निवडणुका निर्भय वातावरणासह शांततेत पार पडण्यासाठी प्रभावी व्हिजिबल पोलिसिंग करा. निवडणुकांच्या पार्श्वभूमीवर करण्यात येणाऱ्या प्रतिबंधात्मक कारवाया तातडीने पूर्ण करा. या निवडणुकांमध्ये पोलिसांनी नि:पक्षपणे, सचोटीने कर्तव्य पार पाडावे अशा सूचना दिल्याची माहिती कोल्हापूर परीक्षेत्राचे विशेष पोलीस महानिरीक्षक सुनिल फुलारी यांनी 'खरा पंचनामा'शी बोलताना दिली. निवडणुकांसाठी सांगली पोलीस दल सज्ज असल्याचेही त्यांनी सांगितले.
नगरपालिका निवडणुकांच्या पार्श्वभूमीवर महानिरीक्षक फुलारी यांनी गुरुवारी सायंकाळी सांगलीतील पोलीस अधिकाऱ्यांची आढावा बैठक घेतली. यावेळी त्यांनी विविध सूचना केल्या. यावेळी पोलीस अधीक्षक संदीप घुगे, अपर पोलीस अधीक्षक कल्पना बारवकर यांच्यासह सर्व पोलीस उपाधीक्षक, सांगली, मिरज, कुपवाड येथील पोलीस ठाण्यांचे प्रभारी अधिकारी उपस्थित होते.
महानिरीक्षक फुलारी म्हणाले, स्थानिक स्वराज्य संस्थांच्या निवडणुकांच्या पार्श्वभूमीवर सराईत गुन्हेगारांवरील प्रतिबंधात्मक कारवाईचा आढावा घेण्यात आला. बहुतांशी कारवाया पूर्ण झाल्या असून उर्वरित येत्या दोन ते तीन दिवसात पूर्ण करण्याच्या सूचना दिल्या आहेत. गेल्या निवडणुकीत गुन्हे दाखल असलेल्यांवर कारवाया करण्यात आल्या आहेत. स्थिर आणि फिरती निरीक्षण पथके अन्य शासकीय विभागाशी समन्वय ठेऊन कार्यरत करण्यात आली आहेत. मतदान होईपर्यंत जिल्ह्यातील विविध भागात नाकाबंदी करण्याच्या सूचनाही दिल्या आहेत.
गुन्हेगारांना वचक बसण्यासाठी आणि नागरिकांना सुरक्षित वाटावे यासाठी सांगली, मिरज, ईश्वरपूर, विटा, तासगाव यासारख्या मोठया शहरामध्ये तेथील प्रभारी पोलीस अधिकाऱ्यांनी वेगवेगळ्या वेळी अंमलदारांना सोबत घेऊन पायी गस्त घालण्याचे आदेश देण्यात आल्याचे महानिरीक्षक फुलारी यांनी सांगितले.
हुल्लडबाजी करणाऱ्यांवर कडक कारवाई करा
सराईत गुन्हेगारांच्या हालचालीवर नजर ठेवा. निवडणुकीपूर्वी निघणाऱ्या प्रचार रॅली, मतमोजणीनंतर हुल्लडबाजी करणाऱ्यांवर गुन्हे दाखल करून कडक कारवाई करा. मतदानासाठी मतदारांना विविध प्रकारची प्रलोभने दाखवणाऱ्या तसेच मतदान करण्यासाठी आणि न करण्यासाठी दमदाटी करणाऱ्यांवर, पैसे, दारू वाटप करणाऱ्यांवर कडक कारवाई करण्याच्या सूचनाही या बैठकीत दिल्याचे महानिरीक्षक फुलारी यांनी सांगितले.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
