वाळू माफियाचा पोलिसांवर हल्ला, एपीआयने हल्लेखोरांवर केला गोळीबार
यवतमाळ : खरा पंचनामा
यवतमाळ जिल्ह्याच्या महागांव वाकोडी परिसरात एक धक्कादायक घटना घडली आहे. इथं कारवाईसाठी गेलेल्या पोलीस पथकावर वाळू माफियांनी हल्ला केला आहे. हा हल्ला झाल्यानंतर एका पोलीस अधिकाऱ्याने थेट वाळू माफियांवर फायरींग केली.
ज्यात एक आरोपी जखमी झाला आहे. दिवसाढवळ्या अशाप्रकारे पोलीस पथक आणि वाळू माफियांमध्ये चकमक घडल्याने परिसरात खळबळ उडाली आहे.
या घटनेची माहिती मिळताच यवतमाळचे अप्पर पोलीस अधीक्षक अशोक थोरात घटनास्थळी दाखल झाले आहेत. त्यांनी घटनेची माहिती घेतली असून कारवाईचे आदेश दिले आहेत. गुलाब खाजा शेख असं गोळीबारात जखमी झालेल्या आरोपीचं नाव आहे. त्याच्या हाताला गोळी चाटून गेली असून त्याचा हात रक्तबंबाळ झाला आहे.
मिळालेल्या माहितीनुसार, यवतमाळ जिल्ह्याच्या महागांव वाकोडी परिसरात अवैध पद्धतीने वाळू उत्खनन होत असल्याची माहिती पोलिसांना मिळाली होती. या गप्त माहितीच्या आधारे सहाय्यक पोलीस निरीक्षक सुनील अंबुरे आपल्या पथकासह कारवाई करण्यासाठी गेले होते. पोलीस पथक घटनास्थळी गेल्यानंतर वाळू माफियांनी पोलिसांवर हल्ला केला. काही आरोपींनी सुनील अंबुरे यांना मारहाण केली.
यानंतर स्वतःचा बचाव करण्यासाठी सहाय्यक पोलीस निरीक्षक अंबुरे यांनी दोन राऊंड फायर केले. यात एक आरोपी जखमी झाला आहे. गुलाब खाजा शेख असं जखमी झालेल्या आरोपीचं नाव आहे. या चकमकीनंतर चार आरोपी फरार झाले आहेत. सर्व आरोपींचा शोध सुरू आहे. पण वाळू माफियांनी केलेल्या हल्ल्यानंतर पोलिसांनी अशाप्रकारे गोळीबार केल्याने परिसरात खळबळ उडाली आहे. घटनेचा पुढील तपास केला जात आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
