दादांच्या निधनानंतर शरद पवार मैदानात!
पाहणीसाठी थेट नीरा नदीवर, बारामतीची धुरा पुन्हा हातात
बारामती : खरा पंचनामा
बारामती नगरीची धुरा गेली गेली साडे तीन दशके अजित पवार यांच्याकडे होती. पण त्यांच्या अकाली जाण्यानंतर आता सूत्रे कोण सांभाळणार? असा यश प्रश्न समोर असताना ज्येष्ठ नेते शरद पवार यांनी पुतण्या गेल्याचे दुःख बाजूला सारून बारामतीजवळील नीरा नदीच्या प्रदूषित पाण्याच्या संदर्भाने नदीकाठची पाहणी केली. शुक्रवारी दुपारी चार वाजता शरद पवार यांनी घराबाहेर पडून पुणे जिल्हा परिषदेचे माजी अध्यक्ष नाना देवकाते यांच्यासोबत प्रदूषित पाण्याची पाहणी केली.
अजित पवार यांच्या जाण्यानंतर राष्ट्रवादी पक्षाचे अस्तित्व आणि नेतृत्वाचा प्रश्न उभा ठाकलेला असताना आणि पक्षातूनही बरेच मतप्रवाह समोर येत असताना शरद पवार यांनी बारामतीत सक्रीय होऊन 'काठावरच्या' नेत्यांना सूचक संदेश देण्याचा प्रयत्न केला. शरद पवार तसे खमके नेते, मनात कितीही दुःख असेल तरी सार्वजनिक मंचावरून कधीही भावनिक न होणारे. मात्र अजित पवार यांच्या जाण्यानंतर ते आतून तुटल्याची भावना त्यांचे मित्र विठ्ठल शेठ मणियार यांनी व्यक्त केली. मात्र पुतण्याच्या निधनाचे दुःख बाजूला ठेवून बारामतीने नेतृत्वाबद्दलची काळजी करण्याची गरज नाही, असे आपल्या कृतीतून शरद पवार यांनी दर्शवले असल्याची चर्चा आहे.
पवार कुटुंबीयांवर आभाळ कोसळले असताना आज बारामतीच्या सोनगाव येथील कऱ्हा आणि नीरा नदीच्या संगमावर अजित पवार यांच्या अस्थींचे विसर्जन करून तसेच दुःख विसरून शरद पवार कामाला लागले. बारामतीच्या निरावागज येथे नीरा नदी प्रदूषणासंदर्भात आलेल्या तक्रारी संदर्भात स्वतः या ठिकाणी जाऊन त्यांनी पाहणी केली. प्रदूषित पाणी हातात घेऊन त्यांनी यावर तोडगा काढण्याचे आश्वासन दिले.
शरद पवार गेली काही महिने सार्वजनिक मंचावर फारसे दिसले नाही. त्यांच्या तब्येतीवर फार परिणाम झाल्याचे जाणवते. त्यांचा आवाजही क्षीण झाला आहे. मध्यंतरी त्यांची प्रकृतीही बरी नव्हती. अशा परिस्थितीत अजित पवार यांच्या जाण्याने त्यांच्यावर मानसिक आघात झाला, असे असूनही त्यांनी आज निरावागज येथील नीरा नदीच्या प्रदूषणाची पाहणी केल्यानंतर त्यांच्या आश्वासक कृतीचे आश्चर्य व्यक्त केले जात आहे.
शरद पवार यांचे न ऐकता अजित पवार यांनी बंड करून भाजपशी घरोबा केला. त्यानंतर पक्षात शरद पवार एकटे पडले. जवळचे सगळे साथीदार त्यांना सोडून गेले. त्यावेळी राष्ट्रवादीचे कसे होणार, पक्षाचे भवितव्य काय असणार? असे प्रश्न उपस्थित होऊ लागले. पत्रकारांनी याच अनुषंगाने प्रश्न विचारला असता, राष्ट्रवादीचा आश्वासक युवा चेहरा मीच, असे शरद पवार यांनी मोठ्या हिमतीने सांगितले. आता अजित पवार यांच्या जाण्यानंतरही पक्षाचे काम करणे मी अजून थांबवले नाही, असा संदेश शरद पवार यांनी आपल्या कृतीतून दाखवून दिला.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
