एकाचवेळी 165 विद्यार्थिनींची अंत्ययात्रा निघाली
इराण शोकसागरात
तेहरान : वृत्तसंस्था
इराण विरुद्ध इस्रायल, अमेरिका संघर्षात शेकडो जणांना जीव गमवावा लागला आहे. इस्रायल, अमेरिकेच्या हल्ल्यांना इराणनं जोरदार प्रत्युत्तर दिलं आहे. पण या युद्धात इराणचं अधिक नुकसान झालं आहे.
इराणच्या मिनाब भागातील एका शाळेवर हवाई हल्ला झाला. त्यात १६० पेक्षा अधिक विद्यार्थिनी मारल्या गेल्या. या मुलींच्या पार्थिवावर आज अंत्यविधी करण्यात आले. नमाज अदा करुन त्यांचे मृतदेह दफन केले गेले.
शाळेवरील हल्ल्यात मृत पावलेल्या विद्यार्थिनींचे मृतदेह शवपेट्यांमध्ये ठेवण्यात आले. त्या मृतपेट्या ओळीनं ठेवण्यात आल्या. त्यांना अखेरचा निरोप देताना नमाज अदा करण्यात आला. यानंतर संपूर्ण शहर शोकसागरात बुडालं. अंत्यविधीच्या नमाजासाठी हजारो जण उपस्थित होते. मिनाब शहरात सामूहिक नमाज अदा करण्यात आला. शहरातील मुख्य मैदान आणि आसपासच्या मशिदींमध्ये मोठ्या संख्येनं लोक जमले होते.
इस्रायल, अमेरिकेच्या हल्ल्यात मारल्या गेलेल्या विद्यार्थिनींची अंत्ययात्रा एकाच वेळी काढण्यात आली. यानंतर नमाज-ए-जनाजा अदा करुन पार्थिवांचं दफन करण्यात आलं. स्थानिकांसोबतच आसपासच्या परिसरातील शेकडो जण मृत पावलेल्या विद्यार्थ्यांना अखेरचा निरोप देण्यासाठी उपस्थित होते. इराणच्या दक्षिण भागात असलेल्या होर्मोजगानमधील मिनाब शहरात २८ फेब्रुवारी रोजी एका शाळेवर हल्ला झाला. या हल्ल्यात १६५ विद्यार्थिनींचा मृत्यू झाला. या सर्व विद्यार्थिनींना आज अखेरचा निरोप देण्यात आला. साश्रू नयनांनी त्यांच्यावर अंत्यविधी करण्यात आले.
इस्रायल, अमेरिकेनं केलेल्या हवाई हल्ल्यात शाळेच्या वस्तूचं मोठं नुकसान झालं. शाळेचा बहुतांश भाग कोसळला. बचाव दलांनी अनेक तास राबून ढिगारा हटवला. मदत आणि बचाव कार्य पूरिण झाल्यानंतर मृतांचा आकडा १६५ सांगण्यात आला. यात प्राथमिक शाळेत शिकणाऱ्या मुलींची संख्या अधिक होती.
विद्यार्थिनींना अखेरचा निरोप देण्यात आला, तेव्हा शहरातील बाजार बंद ठेवण्यात आला. शोकसागरात बुडालेल्या नागरिकांनी काळ्या पट्ट्या बांधून हल्ल्याचा निषेध केला. अनेक ठिकाणी शांततेसाठी मोर्चे काढण्यात आले. मशिदींमध्ये विशेष प्रार्थना करण्यात आल्या. युद्ध सुरु असल्यानं शाळा, महाविद्यालयं बंद ठेवण्यात आली आहेत.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
