"राजकारणात पूर्णविराम नसतो..."
पंतप्रधान मोदींनी शरद पवार आणि खडगेंचे केले कौतुक
नवी दिल्ली : खरा पंचनामा
संसदेच्या वरिष्ठ सभागृह असलेल्या राज्यसभेतील ३७ सदस्यांचा कार्यकाळ संपत असून या पार्श्वभूमीवर निरोप समारंभाचे आयोजन करण्यात आले. नव्याने निवडून आलेले सदस्य सभागृहात प्रवेश करणार असताना काही अनुभवी सदस्यांचा प्रवास येथे थांबणार आहे. या प्रसंगी पंतप्रधान नरेंद्र मोदी यांनी सभागृहाला संबोधित करत राजकारणातील सातत्य आणि अनुभवाचे महत्त्व अधोरेखित केले.
पंतप्रधानांनी आपल्या भाषणात राज्यसभा हे केवळ सभागृह नसून शिकण्याचे केंद्र असल्याचे सांगितले. येथे प्रत्येक सदस्य आपल्या अनुभवातून काहीतरी देतो आणि काहीतरी शिकतो, असे त्यांनी नमूद केले. नव्या सदस्यांनी ज्येष्ठांकडून शिकून आपली वाटचाल अधिक समृद्ध करावी, असा सल्लाही त्यांनी दिला. राजकारणात कधीच पूर्णविराम नसतो, तर तो सतत चालणारा प्रवास असतो, असेही त्यांनी स्पष्ट केले. या वेळी त्यांनी विरोधी पक्षनेते मल्लिकार्जुन खडगे आणि ज्येष्ठ नेते शरद पवार व एच. डी. देवेगौडा यांचे विशेष कौतुक केले. या नेत्यांनी आपल्या आयुष्याचा मोठा काळ सार्वजनिक जीवन आणि संसदीय कार्यासाठी दिला असून त्यांच्याकडून प्रेरणा घेण्याची गरज असल्याचे त्यांनी सांगितले.
निरोप घेत असलेल्या सदस्यांबाबत बोलताना पंतप्रधानांनी सांगितले की, सभागृहातील चर्चा, अनुभव आणि योगदान यामुळे संसदीय कार्य अधिक समृद्ध होते. काही सदस्य सभागृहाबाहेर नव्या जबाबदाऱ्या स्वीकारतील, मात्र त्यांचा अनुभव समाजकार्यात आणि सार्वजनिक जीवनात उपयोगी पडत राहील, अशी अपेक्षा त्यांनी व्यक्त केली. यानंतर विरोधी पक्षनेते मल्लिकार्जुन खडगे यांनीही आपले विचार मांडले. राजकारणात कोणीही खऱ्या अर्थाने निवृत्त होत नाही, असे सांगत त्यांनी स्वतःच्या दीर्घ अनुभवाचा उल्लेख केला. अनेक वर्षांच्या प्रवासानंतरही शिकण्याची प्रक्रिया सुरूच असल्याचे त्यांनी नमूद केले. या निरोप समारंभातून संसदीय परंपरेतील सन्मान, अनुभवांची देवाणघेवाण आणि नव्या पिढीला मार्गदर्शन यांचे महत्त्व पुन्हा अधोरेखित झाले.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
