छत्रपती शिवरायांच्या पुतळ्यावरून वाद चिघळला; लक्ष्मण हाकेंची सरकारी अधिकाऱ्याला धक्काबुक्की
माढा : खरा पंचनामा
पंढरपूरच्या अंजनगावमध्ये मोठा राडा झाला आहे. अंजनगाव छत्रपती शिवरायांच्या पुतळ्यावरून दोन गटात वाद पेटला आहे. वादानंतर अंजनगावात लक्ष्मण हाके देखील पोहोचले आहेत. याच गावात असलेल्या खेलोबा मंदिराच्या जागेची मोजण्यासाठी आलेल्या शासकीय अधिकाऱ्याला ओबीसी नेते लक्ष्मण हाके यांनी थेट धक्काबुक्की केल्याचं समोर आलं आहे. या घटनेने परिसरातील वातावरण चिघळलंय.
अंजनगाव खेलोबा मंदिराच्या जागेची मोजणी करून पुतळ्याचा निर्णय घेतला जाणार होता. या पार्श्वभूमीवर घटनास्थळी दोन्ही गटाचे व्यक्ती, पोलीस आणि शासकीय अधिकारी मोठ्या प्रमाणात जमले होते. मंदिराच्या जागेची मोजणी करण्यासाठी शासकीय अधिकारी पुढे आले. परंतु त्याचवेळी हाके यांनी शासकीय कर्मचाऱ्याला मोजणी करण्यापासून रोखले.
हाके पुढे धावल्यानंतर पोलिसांनी तातडीने मध्यस्थी केली. हाके यांना रोखल्याने घटनास्थळी वातावरण चिघळल्याचे समोर आलं. घटनास्थळी पोलिसांचा मोठा फौजफाटा तैनात असल्याने परिस्थिती नियंत्रणात आहे. लक्ष्मण हाके यांनी शासकीय अधिकाऱ्याला धक्काबुक्की करत मोजणी रोखल्याने वाद टोकाला गेला आहे.
अंजनगावातील वादात मराठा क्रांती मोर्चानेही उडी घेतली आहे. लक्ष्मण हाके यांच्यावर अधिकाऱ्यांना धक्काबुक्की केल्याप्रकरणी आणि शासकीय कामात अडथळा आणल्या प्रकरणी 353 कलमान्वये गुन्हा दाखल करून त्यांना तत्काळ अटक करावी, अशी मागणी मराठा क्रांती मोर्चाचे राज्य समन्वयक महेश डोंगरे पाटील यांनी केली आहे.
लक्ष्मण हाके यांच्यावर तत्काळ कारवाई करावी अन्यथा मराठा क्रांती मोर्चाच्या वतीने राज्यभर तीव्र आंदोलन केले जाईल, असा इशारा देखील महेश डोंगरे पाटील यांनी दिलाय. मराठा क्रांती मोर्चाच्या इशाऱ्यानंतर पोलीस काय कारवाई करतात, हे पाहावे लागेल.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
