गुन्हेगाराशी मैत्री पोलीस शिपायाला पडली महागात
पुणे : खरा पंचनामा
समर्थ पोलीस ठाण्यात कार्यरत असलेल्या एका पोलीस शिपायावर शिस्तभंगाची कारवाई करण्यात आली असून त्याची एक वर्षाची वेतनवाढ रोखण्याचा निर्णय घेण्यात आला आहे. सराईत गुन्हेगाराशी संपर्क ठेवल्यामुळे ही कारवाई करण्यात आली असून यामुळे पोलीस वर्तुळात चर्चेला उधाण आले आहे.
मिळालेल्या माहितीनुसार, संबंधित पोलीस कर्मचारी वैद्यकीय रजेवर असताना देखील एका गुन्हेगाराच्या संपर्कात होता. तांत्रिक तपासात ऑक्टोबर आणि नोव्हेंबर 2025 या कालावधीत त्याने संबंधित व्यक्तीशी अनेक वेळा संपर्क साधल्याचे स्पष्ट झाले. हा गुन्हेगार विविध गंभीर गुन्ह्यांमध्ये सहभागी असल्याचे समोर आले आहे.
या प्रकरणाची माहिती मिळताच वरिष्ठ अधिकाऱ्यांनी याची गंभीर दखल घेतली. परिमंडळ 1 चे पोलीस उपायुक्त कृषिकेश रावले यांनी या प्रकरणाची चौकशी करून संबंधित कर्मचाऱ्यावर कारवाई केली. सुरुवातीला दोन वर्षांची वेतनवाढ रोखण्याचा विचार करण्यात आला होता. मात्र कर्मचाऱ्याचे स्पष्टीकरण लक्षात घेऊन अंतिम निर्णयात एक वर्षाची वेतनवाढ रोखण्याची शिक्षा देण्यात आली.
या प्रकरणात यापूर्वीच गुन्हे शाखेतील दोन कर्मचाऱ्यांवर निलंबनाची कारवाई करण्यात आली होती. ते देखील त्याच गुन्हेगाराच्या संपर्कात असल्याचे तपासात उघड झाले होते. त्यामुळे पोलीस दलात शिस्त राखण्याच्या दृष्टीने ही कारवाई महत्त्वाची मानली जात आहे.
पोलीस प्रशासनाकडून गुन्हेगारांशी संबंध ठेवणाऱ्या कर्मचाऱ्यांवर कठोर कारवाई केली जाईल, असा स्पष्ट संदेश देण्यात आला आहे. या घटनेमुळे पोलीस विभागात सतर्कता वाढली असून अशा प्रकारांवर नियंत्रण ठेवण्यावर भर दिला जात आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
