पश्चिम बंगालमध्ये उद्या पुन्हा मतदान होणार; निवडणूक आयोगाचा मोठा निर्णय
कोलकाता : खरा पंचनामा
पश्चिम बंगालमध्ये सुरू असलेल्या निवडणूक प्रक्रियेदरम्यान निवडणूक आयोगाने एक महत्त्वाचा निर्णय घेतला आहे. राज्यातील १५ मतदान केंद्रांवरील मतदान रद्द करण्यात आले असून, या ठिकाणी उद्या, २ मे रोजी पुन्हा मतदान घेण्याचे आदेश देण्यात आले आहेत.
निवडणूक आयोगाने दिलेल्या माहितीनुसार, या १५ बूथपैकी ११ बूथ १४२-मगरहाट पश्चिम विधानसभा मतदारसंघात आहेत, तर उर्वरित ४ बूथ १४३-डायमंड हार्बर विधानसभा मतदारसंघात आहेत. या सर्व केंद्रांवर दुसऱ्या टप्प्यात २९ एप्रिल रोजी मतदान झाले होते. उद्या सकाळी ७ ते संध्याकाळी ६ या वेळेत या केंद्रांवर पुन्हा मतदान प्रक्रिया पार पडेल.
निवडणूक आयोगाने लोकप्रतिनिधी कायदा, १९५१ च्या कलम ५८(२) अंतर्गत प्राप्त अधिकारांचा वापर करून या केंद्रांवरील निवडणूक प्रक्रिया रद्द केली आहे. रिटर्निंग ऑफिसर्स आणि निरीक्षकांच्या अहवालाच्या आधारे हा निर्णय घेण्यात आला आहे. दक्षिण २४ परगणा जिल्ह्यातील ७७ बूथवर फेरमतदान घेण्याची मागणी करण्यात आली होती. सध्या १५ बूथबाबत निर्णय झाला असून, अन्य केंद्रांबाबतचा अहवाल अद्याप प्रलंबित आहे.
तृणमूल काँग्रेसचे राष्ट्रीय सरचिटणीस अभिषेक बॅनर्जी यांचे प्रतिनिधित्व असलेल्या डायमंड हार्बर लोकसभा क्षेत्रातील विधानसभा जागांवर भाजपने गंभीर आरोप केले होते. या ठिकाणी मोठ्या प्रमाणावर निवडणूक गैरप्रकार आणि फेरफार झाल्याचा दावा भाजपने केला होता. या तक्रारींची दखल घेत निवडणूक आयोगाने विशेष निरीक्षक सुब्रत गुप्ता यांची नियुक्ती केली होती, ज्यांच्या अहवालानंतर हा मोठा निर्णय घेण्यात आला आहे.
दरम्यान, २ मे रोजी होणाऱ्या या मतदानासाठी प्रशासनाने कडेकोट बंदोबस्त तैनात केला असून, निष्पक्ष मतदानासाठी सर्व यंत्रणा सज्ज करण्यात आली आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
