नेपाळ दुर्घटना : मृतांचा आकडा 1,344 वर; 169 भारतीयांची सुटका
दिल्ली : खरा पंचनामा
नेपाळमध्ये आलेल्या भीषण फ्लॅश फ्लड्समुळे परिस्थिती गंभीर बनली आहे. स्थानिक पोलिसांच्या माहितीनुसार आणि ताज्या आकडेवारीनुसार, या महापुरातील मृतांचा आकडा 1,344 वर पोहोचला आहे. तर, हजारो नागरिक अद्याप बेपत्ता असून पूर प्रभावित भागांमध्ये बचाव आणि शोधमोहीम सुरू आहे.
या संकटाच्या पार्श्वभूमीवर भारत सरकार नेपाळच्या प्रशासनाच्या सतत संपर्कात आहे. विशेषतः पुरात बेपत्ता झालेल्या भारतीय नागरिकांचा शोध घेण्यासाठी भारतीय अधिकारी नेपाळ सरकारशी सातत्याने समन्वय साधत आहेत.
भारताच्या परराष्ट्र मंत्रालयाने (MEA) शुक्रवारी दिलेल्या माहितीनुसार, नेपाळमधील पुरग्रस्त भागांतून आतापर्यंत 169 भारतीय नागरिकांची सुटका करण्यात आली आहे. मात्र, 275 भारतीय नागरिक अद्याप बेपत्ता असल्याची माहिती मंत्रालयाने दिली आहे.
नुवाकोट जिल्ह्यातील त्रिशूली बाजार परिसरातून शुक्रवारी करण्यात आलेल्या बचावकार्यात 3 भारतीय नागरिकांची सुटका झाली. यामध्ये अभिजीत सुरेश पवार, दीपिका अभिजीत पवार आणि 5 वर्षांचा समर्थ अभिजीत पवार यांचा समावेश आहे. दरम्यान, काठमांडूमधील भारतीय दूतावास या तिघांना भारतात परत आणण्यासाठी आवश्यक ती मदत करत आहे.
परराष्ट्र मंत्रालयाने दिलेल्या माहितीनुसार, चीनमधून 1,907 भारतीय नागरिक सुरक्षितपणे नेपाळमध्ये दाखल झाले आहेत. चीनमधील अधिकृत सूत्रांकडून मिळालेल्या माहितीनुसार, तिबेट स्वायत्त प्रदेशात सध्या कोणताही भारतीय प्रवासी अडकलेला नाही, असे परराष्ट्र मंत्रालयाचे प्रवक्ते रणधीर जयस्वाल यांनी सांगितले.
नेपाळमधील स्थानिक अधिकाऱ्यांच्या माहितीनुसार, पुरात अडकलेल्या 12,000 हून अधिक नागरिकांना वाचवण्यात आले आहे. मात्र, सुमारे 5,000 जण अद्याप बेपत्ता असल्याचे सांगण्यात आले आहे. दरम्यान, बचाव पथके प्रभावित भागांमध्ये सातत्याने शोधमोहीम राबवत असून आणखी नागरिकांचा शोध घेण्याचे प्रयत्न सुरू आहेत.
भारताने नेपाळमधील मदतकार्यासाठी आतापर्यंत सुमारे 95 टन मदत सामग्री पाठवली आहे. ही सामग्री 7 विमानांमधून नेपाळमध्ये पोहोचवण्यात आली आहे. याशिवाय नेपाळ सरकारच्या मागणीनुसार भारताकडून आणखी फॉरेन्सिक किट्स, बेली ब्रिज आणि इतर आवश्यक साहित्य पाठवण्याची तयारी असल्याचे रणधीर जयस्वाल यांनी सांगितले.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
