कोठडीत जाण्यापूर्वीच अभिजीत दिपकेंचा रेकॉर्डेड संदेश; 'आता आंदोलन अजिंक्य शिंदे लीड करणार'
नवी दिल्ली : खरा पंचनामा
कॉकरोच जनता पार्टीचे (CJP) संस्थापक अभिजीत दिपके, सौरव दास आणि आशुतोष रांका यांना दिल्ली विमानतळावर विमानातून उतरण्यापूर्वीच पोलिसांनी ताब्यात घेतल्यानंतर CJPने दिपके यांचा आधीच रेकॉर्ड केलेला व्हिडिओ प्रसिद्ध केला आहे. या व्हिडिओत दिपके यांनी, 'तुम्ही हा व्हिडिओ पाहत असाल, तर याचा अर्थ आम्हाला ताब्यात घेण्यात आले आहे. आमच्यानंतर अजिंक्य शिंदे आंदोलनाचे नेतृत्व करतील,' असे म्हटले आहे. अजिंक्य शिंदे हे CJPचे संघटन प्रभारी असल्याचे वृत्त आहे.
मुख्य निवडणूक आयुक्त ज्ञानेश कुमार यांच्या राजीनाम्याची मागणी आणि मतदार याद्यांच्या विशेष सखोल पुनरिक्षण अर्थात SIR प्रक्रियेविरोधात CJP ने जंतर-मंतर येथे आंदोलनाची घोषणा केली होती. मात्र दिल्ली पोलिसांनी या आंदोलनाला परवानगी नाकारली होती. दिपके, दास आणि रांका दिल्लीमध्ये दाखल होताच पोलिसांनी विमानात प्रवेश करून त्यांना ताब्यात घेतले.
याच पार्श्वभूमीवर यूट्यूबर ध्रुव राठी यांनाही गुरुग्राममधील त्यांच्या निवासस्थानातून ताब्यात घेण्यात आले. गुरुग्राम पोलिसांच्या म्हणण्यानुसार, आंदोलनाला परवानगी नसल्याने राठी यांना सहभागी होऊ नये असे सांगण्यात आले होते; मात्र त्यांनी आंदोलनात जाण्याची भूमिका कायम ठेवल्यानंतर त्यांना ताब्यात घेण्यात आले.
दिल्लीतील विविध भागांतून आंदोलनस्थळी जाण्याचा प्रयत्न करणाऱ्या मोठ्या संख्येने कार्यकर्त्यांना पोलिसांनी ताब्यात घेतले. काही वृत्तांनुसार प्रतिबंधात्मक कारवाईत एक हजाराहून अधिक जणांना ताब्यात घेण्यात आले. पोलिसांनी शहरात मोठ्या प्रमाणावर बंदोबस्त तैनात केला असून बॅरिकेड्स, ड्रोन, बॉडी कॅमेरे आणि वाहन तपासणीसह अनेक उपाययोजना केल्या आहेत.
जंतर-मंतरकडे जाणाऱ्या मार्गांवर कडेकोट बंदोबस्त ठेवण्यात आला. पोलिसांनी आंदोलनकर्त्यांना नेण्यासाठी शेकडो बसेस आणि स्वतंत्र ताबा केंद्रांची व्यवस्था केली होती. दिल्लीतील संवेदनशील भागात हजारो पोलीस आणि निमलष्करी जवान तैनात करण्यात आले.
दिल्लीतील आंदोलनाच्या पार्श्वभूमीवर केरळचे माजी मुख्यमंत्री पिनराई विजयन, CPI(M) चे सरचिटणीस एम. ए. बेबी, वृंदा करात, जॉन ब्रिटास यांच्यासह अनेक डाव्या पक्षांच्या नेत्यांनाही पोलिसांनी ताब्यात घेतले. हे नेते जंतर-मंतरकडे जात असताना त्यांच्यावर कारवाई करण्यात आली.
अभिजीत दिपके यांना ताब्यात घेतल्यानंतर त्यांच्या कुटुंबीयांनीही कारवाईवर प्रश्न उपस्थित केले. त्यांच्या आई अनिता दिपके यांनी आपल्या मुलाबाबत होत असलेल्या कारवाईमुळे आपण व्यथित असल्याचे सांगत सरकारवर टीका केली. दिपके देशासाठी काम करत असल्याचा दावा त्यांनी केला.
दरम्यान, CJPने आंदोलन शांततापूर्ण ठेवण्याचे आवाहन केले असून समर्थकांनी बॅरिकेड्स तोडू नयेत, हिंसाचार करू नये आणि प्रतिबंधित भागात जबरदस्तीने प्रवेश करू नये, असेही स्पष्ट केले आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
