टायगर श्रॉफ गोळीबार प्रकरणातील संशयिताबाबत Rapido चे स्पष्टीकरण; संबंधित व्यक्ती १४ ऑक्टोबरपासून सक्रिय नसल्याचा दावा
मुंबई : खरा पंचनामा
अभिनेता टायगर श्रॉफच्या गाडीवर झालेल्या गोळीबार प्रकरणात 'रॅपिडो' या बाईक टॅक्सी आणि प्रवासी वाहतूक सेवा देणाऱ्या प्लॅटफॉर्मवर कॅप्टन म्हणून नोंदणी असलेल्या एका व्यक्तीचा उल्लेख विविध माध्यमांमध्ये करण्यात आला होता.
यावर स्पष्टीकरण देताना कंपनीने सांगितले की, संबंधित व्यक्ती १४ ऑक्टोबरपासून रॅपिडोवर कॅप्टन किंवा चालक म्हणून सक्रिय नव्हती. मात्र, घटनेच्या दिवशी त्या व्यक्तीने 'रॅपिडो'च्या सेवांचा ग्राहक म्हणून वापर केला होता, अशी महत्त्वाची माहिती कंपनीकडून देण्यात आली आहे.
तपासात पोलिसांना सहकार्य सुरू
'रॅपिडो'ने सोशल मीडिया प्लॅटफॉर्म 'एक्स'वर पोस्ट केलेल्या निवेदनात टायगर श्रॉफ आणि त्याच्या टीमशी संबंधित घटनेबद्दल चिंता व्यक्त केली. टायगर श्रॉफ पूर्णपणे सुरक्षित असल्याची माहिती मिळताच कंपनीने मोठा दिलासा व्यक्त केला असून, त्याच्या प्रकृतीत लवकरात लवकर सुधारणा व्हावी, अशा सदिच्छाही दिल्या आहेत. विविध माध्यमांमध्ये येत असलेल्या वृत्तांमध्ये 'रॅपिडो' प्लॅटफॉर्मवर कॅप्टन म्हणून नोंदणी असलेल्या एका व्यक्तीचा उल्लेख असल्याची कंपनीला माहिती मिळाली असल्याचे म्हटले आहे. मात्र, ती व्यक्ती १४ ऑक्टोबरपासून कॅप्टन म्हणून सक्रिय नव्हती, असा दावा कंपनीकडून करण्यात आला आहे.
भारतातील गिग इकॉनॉमीमध्ये अनेक व्यक्ती एकाच वेळी वेगवेगळ्या सेवा देणाऱ्या प्लॅटफॉर्मवर नोंदणी करू शकतात, असेही कंपनीने स्पष्ट केले. अभिनेता टायगर श्रॉफच्या प्रकरणाशी संबंधित असलेल्या व्यक्तीने, ज्या दिवशी ही गोळीबाराची घटना घडली, त्याच दिवशी 'रॅपिडो'च्या सेवांचा वापर ग्राहक म्हणून केला होता, अशी महत्त्वाची माहिती समोर आली आहे. या प्रकरणाच्या तपासासाठी 'रॅपिडो' संबंधित अधिकाऱ्यांच्या सतत संपर्कात असल्याचे कंपनीने सांगितले. पोलिसांनी मागितलेली माहिती तातडीने उपलब्ध करून दिली असून तपासात पूर्ण सहकार्य सुरू ठेवणार असल्याचेही निवेदनात नमूद करण्यात आले आहे. 'हिंसाचार आणि गुन्हेगारी कृत्यांबाबत 'रॅपिडो'चे शून्य सहनशीलतेचे धोरण आहे. तपासासाठी आम्ही पूर्ण सहकार्य करत राहू,' असे कंपनीने स्पष्ट केले.
१८ ऑक्टोबर रोजी टायगर श्रॉफ फुटबॉल मैदानातून बाहेर पडत असताना त्याच्या गाडीवर दोन हल्लेखोरांनी गोळीबार केला होता. या हल्ल्यात अभिनेता बचावला. मात्र, त्याचा चालक आणि एक चाहता जखमी झाल्याचे वृत्त आहे. पोलिसांनी दिलेल्या माहितीनुसार, याप्रकरणी तिघांना अटक करण्यात आलेली आहे. बिहारमधील हृतिक हा रॅपिडोवर रायडर म्हणून काम करतो, तर अन्य दोघे मजुरी करतात, असे पोलीस अधीक्षकांनी सांगितले. तिघांपैकी दोघांविरोधात यापूर्वी शस्त्रास्त्र कायद्यांतर्गत गुन्हा आणि दुचाकी चोरीचा गुन्हा दाखल असल्याची माहितीही पोलिसांनी दिली. त्यांच्या गुन्हेगारी पार्श्वभूमीचा सविस्तर तपशील मुंबई पोलीस चौकशीनंतर स्पष्ट करतील.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
