एमडी ड्रग्जप्रकरणी आणखी तिघांना अटक, मुंबईतील दोन तर वाळवा तालुक्यातील एकाचा समावेश
फायनान्सर, मार्गदर्शक जाळ्यात; सांगली एलसीबीची कारवाई : पोलीस अधीक्षक संदीप घुगे
पहा व्हिडीओ
सांगली : खरा पंचनामा
विट्याजवळील कार्वे (ता. खानापूर) येथील एमडी ड्रग्ज प्रकरणी आणखी तिघांना अटक करण्यात आली आहे. यातील दोघे मुंबईचे असून वाळवा तालुक्यातील शेणे येथील एकाचा समावेश आहे. यातील एकाने आर्थिक मदत (फायनान्सर) केली होती. एलसीबीने ही कारवाई केली असून अजून काही संशयितांना अटक होण्याची शक्यता असल्याचे पोलीस अधीक्षक संदीप घुगे यांनी सांगितले.
जितेंद्र शरद परमार (वय ४१, रा. नागडोंगरी, ता. अलिबाग, सध्या रा. ताहिर बेकरीच्यावर माहिम १६ मुंबई), अब्दुलरज्जाक अब्दुलकादर शेख (वय ५३, रा. उस्मानिया मशिदजवळ, पाठणवाडी, फिल्डरवाडा, पवई, मुंबई) आणि सरदार उत्तम पाटील (वय ३४, रा. शेणे, ता. वाळवा, जि. सांगली) या तिघांना अटक करण्यात आली. याप्रकरणी यापूर्वी रहुदिप बोरिचा (रा. कोसंबा, जि. सुरत) सुलेमान शेख (रा. बांद्रा, मुंबई), बलराज अमर कातारी (वय २४, रा. विटा) या तिघांना दि. २७ रोजी अटक करण्यात आली आहे. या प्रकरणाचा तपास एलसीबीचे वरिष्ठ पोलीस निरीक्षक सतिश शिंदे करत आहेत.
कार्वे येथील औद्योगिक वसाहतीमध्ये एमडी ड्रग्ज बनवणाऱ्या कारखान्यावर एलसीबीच्या पथकाने छापा टाकला होता. त्यावेळी रहुदिप बोरिचा, सुलेमान शेख, बलराज कातारी या तिघांना दि. २७ रोजी अटक करण्यात आली होती. तेथून २९ कोटी रूपयांचे १४ किलो ५०० ग्रॅम एमडी जप्त करण्यात आले.
एलसीबीने तिघांची कसून चौकशी केली. तेव्हा आणखी जितेंद्र परमार, अब्दुलरज्जाक शेख, सरदार पाटील यांची नावे निष्पन्न झाली. यातील परमार याने कारखाना सुरु करण्यासाठी आर्थिक मदत केली होती. तर पाटील मार्गदर्शन करत होता. शेख याने मुंबईत ड्रग्ज विक्रीचीजबाबदारी घेतली होती.
या सहाजणांची मुंबईतील ऑर्थर रोड कारागृहात ओळख झाली होती. सहाजणांनी जामिनावर मुक्त झाल्यानंतर एकत्र येऊन एमडी ड्रग्जचा कारखाना सुरू करण्याचे ठरवले. त्यानुसार रहुदिप याने दिल्ली येथून मशिनरी मागवली. सुलेमान शेख याने दिल्लीतील कंपनीस पैसे पाठवले. त्यानंतर दोघांनी बलराजच्या मदतीने विटा येथे मशिनरी बसवली. मशिनरी बसवण्यासाठी जितेंद्र याने आर्थिक मदत केली. सरदार पाटील याला ड्रग्ज विषयी माहिती असल्यामुळे त्याने दोन-तीनवेळा येथे येऊन मार्गदर्शन केले. तर बलराज हा अब्दुलरज्जाक शेख याला पुणे, मुंबईत जाऊन माल देत होता. जितेंद्र, अब्दुलरज्जाक व सरदार या तिघांना फलटण येथून ताब्यात घेण्यात आले.
पोलीस अधीक्षक संदीप घुगे यांच्या मार्गदर्शनाने एलसीबीचे वरिष्ठ निरीक्षक सतीश शिंदे, सहायक निरीक्षक पंकज पवार, नितीन सावंत, उपनिरीक्षक, कुमार पाटील, संदीप गुरव, मच्छिंद्र बर्डे, सागर लवटे, अनिल कोळेकर, उदय साळुंखे, अमर नरळे, महादेव नागणे, अतुल माने, संदीप नलवडे, उदय माळी, रणजित जाधव, विक्रम खोत, सुमित सुर्यवंशी, गणेश शिंदे, सायबर पोलीस ठाणेकडील कॅप्टन गुंडवाडे आदींच्या पथकाने ही कारवाई केली.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.