'मला काही खंत नाही, तेव्हाच माफी मागणार जेव्हा...,'
मुंबई : खरा पंचनामा
स्टँडअप कॉमेडियन कुणाल कामराने आपल्याला गद्दार असा उल्लेख केल्याचा कोणताही पश्चाताप नसल्याचं म्हटलं आहे. तसंच जर आपल्याला कोर्टाने सांगितलं तरच माफी मागणार असल्याची भूमिका मांडली आहे.
मुख्यमंत्री देवेंद्र फडणवीस यांनी कुणाल कामराने माफी मागावी अशी मागणी केली आहे. विधानसभेत बोलताना त्यांनी अभिव्यक्ती स्वातंत्र्याच्या नावाखाली नीच दर्जाचा विनोद आणि उपमुख्यमंत्र्यांचा अनादर केला जाऊ शकत नाही असं ते म्हणाले आहेत.
सूत्रांच्या माहितीनुसार, मुंबई पोलिसांनी फोनवरुन कुणाल कामराची चौकशी केली. कुणाल कामराने आपण तामिळनाडूत असल्याचं सांगितलं आहे. यावेळी त्याने विरोधकांनी आपल्याला उपमुख्यमंत्री एकनाथ शिंदे यांना टार्गेट करण्यासाठी पैसे दिल्याचा आरोप फेटाळून लावला. खात्री करण्यासाठी कुणाल कामराने आपली खाती तपासण्याची परवानगीही दिली आहे.
कुणाल कामराच्या स्टँडअपनंतर शिवसैनिक आक्रमक झाले असून त्यांनी स्टुडिओची तोडफोड केली आहे. दरम्यान याप्रकरणी सत्ताधारी आणि विरोधकही आमने-सामने आले आहेत. सत्ताधारी आमदारांनी कुणाल कामराला अटक करण्याची मागणी केली आहे. तर विरोधकांनी कुणाल कामराची बाजू घेतली आहे.
"महाराष्ट्राच्या निवडणुकीत यांनी काय केलं आहे पाहा. शिवसेना भाजपामधून बाहेर आली. मग शिवसेना शिवसेनेतून बाहेर आली. राष्ट्रवादी राष्ट्रवादीमधून बाहेर आली. एका मतदाराला 9 बटणं दिली. सगळेच गोंधळून गेले. मुंबईतील ठाणे जिल्ह्यातील एकाने सुरु केलं होतं," असं म्हणत कुणालने पुढे 'भोली सी सुरत, आँखो मे मस्ती' गाण्याच्या चालीवर एक गाणं सादर केलं. यामध्ये त्याने ठाण्यातील रिक्षा, चेहऱ्यावर दाढी, डोळ्यावर चष्मा असा उल्लेख गाण्यामधून केला आहे. तसेच पुढे बोलताना, "एक झलक दाखवून कधी गुवहाटीमध्ये लपले," असंही म्हटलं आहे. शिवसेनेत फूट पडल्यानंतर एकनाथ शिंदे बंडखोर आमदारांबरोबर काही काळ गुवहाटीमध्ये वास्तव्यास असल्याचा संदर्भ यामधून देण्याचा प्रयत्न कामराने केला आहे.
याच गाण्याच्या चालीत कामराने, "माझ्या नजरेतून पाहिलं तर ती व्यक्ती गद्दार आहे," असंही म्हटलं आहे. "मंत्री नाही तर ती व्यक्ती पक्ष बदलणारी आहे, अजून काय सांगू?" असंही कामराने म्हटलंय. "ज्या थाळीत खाल्लं त्याच थाळीत त्यांनी छिद्र केलं," असंही कामराने या गाण्यात म्हटलं आहे. "राजकीय परिवारवाद संपवायचा होता म्हणून यांनी बाप चोरला असं यांचं राजकारण आहे," असं कामराने गाण्यात म्हटलं आहे.
दरम्यान हॅबिटट स्टुडिओ जिथे हा कार्यक्रम झाला त्यांनी कुणाल कामराच्या विधानापासून फारकत घेतली असून आपला काही संबंध नसल्याचं म्हटलं आहे. परफॉर्मरने केलेल्या विधानासाठी आम्हाला जबाबदार धरलं जाऊ शकत नाही असं त्यांनी म्हटलं आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
