मिरजेत सुगंधी तंबाखू, गुटखा, पानमसाला जप्त : पाच जणांना अटक
टेम्पोसह 19 लाखांचा मुद्देमाल जप्त : महात्मा गांधी चौक पोलिसांची कारवाई
सांगली : खरा पंचनामा
मिरज-कुपवाड एमआयडीसी रस्त्यावर प्रतिबंधित सुगंधी तंबाखू, गुटखा, पानमसाला यांची बेकायदा वाहतूक करणारा टेम्पो पकडून पाच जणांना अटक करण्यात आली आहे. यावेळी टेम्पो, तंबाखू, गुटखा, पानमसाला असा 19 लाखांचा मुद्देमाल जप्त करण्यात आल्याची माहिती मिरजेतील महात्मा गांधी चौक पोलीस ठाण्याचे प्रभारी सहायक पोलीस निरीक्षक संदीप शिंदे यांनी दिली.
मुख्तार मेहबूब मुजावर (रा. बिसूर बस स्टैंडजवळ, बिसूर, ता. मिरज), उमेश शंकर पाटील (रा. रेल्वे स्टेशनजवळ, कुडची, ता. अथणी, जि. बेळगांव, कर्नाटक), सलीम गुरुसाथ आवटी (रा. शाहूनगर, बेळगांव, कर्नाटक), नयुम दिलावर शेख (रा. गणेशनगर, आटपाडी, ता. आटपाडी), भरतेश सिध्दराम कुडचे (रा. नदीवेस, वेताळ मंदीराजवळ, मिरज, ता. मिरज) अशी अटक केलेल्यांची नावे आहेत. 'नशामुक्त भारत अभियान' अंतर्गत अंमली पदार्थांची तस्करी, विक्री, साठा करणाऱ्यांवर कारवाई करण्याच्या सूचना सहायक निरीक्षक शिंदे यांनी गुन्हे प्रकटीकरण शाखेला दिल्या होत्या. त्यानुसार सायबर पोलीस ठाण्याचे उपनिरीक्षक अफरोज पठाण आणि महात्मा गांधी चौक पोलिसांचे पथक तस्करांच्या मागावर होते. सहायक निरीक्षक शिंदे यांना मिरज ते कुपवाड एमआयडीसी रस्त्यावरून बिसूर येथील मुजावर एका टेम्पोमधून सुगंधी तंबाखू, गुटखा, पानमसालाची तस्करी करत असल्याची माहिती खबऱ्याद्वारे मिळाली. त्यांनी पथकाला कारवाईच्या सूचना दिल्या.
पथकाने सापळा लावला होता. मिळालेल्या माहितीनुसार टेम्पो (एमएच 10 सीआर 6386) तेथे आल्यावर तो थांबवून त्याची तपासणी केल्यावर त्यात सुगंधी तंबाखू, गुटखा, पानमसाला सापडला. त्यानंतर मुजावर याला ताब्यात घेऊन कसून चौकशी केल्यावर त्यांने कर्नाटक येथून हा माल विक्रीसाठी आणल्याची कबुली दिली. तसेच अन्य चार संशयितांची नावे सांगितली. त्यानंतर पाचही जणांना अटक करून टेम्पो, तंबाखू, गुटखा, पानमसाला असा 19 लाखांचा मुद्देमाल जप्त केला. त्यांच्याविरोधात महात्मा गांधी चौक पोलीस ठाण्यात गुन्हा दाखल करण्यात आला आहे.
महात्मा गांधी चौक पोलीस ठाण्याचे प्रभारी सहायक पोलीस निरीक्षक संदीप शिंदे, सायबरच्या सहायक निरीक्षक रुपाली बोबडे यांच्या मार्गदर्शनाखाली उपनिरीक्षक अफरोज पठाण, उपनिरीक्षक रुपाली गायकवाड, संदीप गुरव, सचिन कुंभार, अभिजीत धनगर, अभिजीत पाटील, सर्जेराव पवार, राहूल क्षीरसागर, नानासाहेब चंदनशिवे, बसवराज कुंदगोळ, विनोद चव्हाण, राजेंद्र हारगे, अमोल तोडकर, श्रेणी उपनिरीक्षक सतीशकुमार पाटील, निवास माने, सुधीर खोंद्रे, गणेश नरळे, कैप्टन गुंडवाडे, अभिजीत पाटील यांच्या पथकाने ही कारवाई केली.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
