महिला पोलीस निरीक्षकाचा भाजप कार्यकर्त्याकडून विनयभंग, बदलीच्या आदेशाला कोर्टाची स्थगिती
पुणे : खरा पंचनामा
पुण्यात ड्युटीवर असताना एका महिला पोलीस निरीक्षकाचा विनयभंग झाल्याची धक्कादायक घटना जून २०२५ मध्ये घडली. शिवाजी रस्त्यावर बंदोबस्त ड्युटीवर असताना ही घटना घडली असून, महिलेने तत्काळ फरासखाना पोलीस ठाण्यात आरोपी भाजपचा कार्यकर्ता प्रमोद कोंढरे याच्याविरुद्ध गुन्हा नोंदवला. मात्र, या प्रकरणात वरिष्ठ अधिकाऱ्यांनी तक्रार करणाऱ्या महिला PI चीच वाहतूक शाखेत बदली केल्याने वाद निर्माण झाला. न्यायालयाने या बदलीला स्थगिती देत बदलीचा आदेश 'दंडात्मक' आणि 'सूडबुद्धीने' काढल्याचे निरीक्षण नोंदवले आहे.
महिला PI ने वरिष्ठांना घटनेची माहिती दिल्यानंतर त्यांना अन्य ठिकाणी बदली स्वीकारण्याचा सल्ला देण्यात आला. याला त्यांनी ठामपणे नकार देत म्हटले, "मी गुन्हा दाखल केला आहे. आता बदली झाली, तर समाजात चुकीचा संदेश जाईल." यानंतर त्या रजेवर गेल्या. मात्र, रजेवरून परतल्यानंतर २१ जुलै २०२५ रोजी त्यांना वाहतूक शाखेत बदलीचा आदेश मिळाला. हा आदेश पोलिस स्थापना मंडळाच्या निर्णयानुसार घेतल्याचे सांगण्यात आले, परंतु प्रत्यक्षात तो 'मनमानी, दंडात्मक आणि महिलांच्या प्रतिष्ठेला धक्का देणारा' असल्याचे त्यांनी न्यायाधिकरणात मांडले.
महिलेच्या युक्तिवादात असे नमूद करण्यात आले की, बदलीचा आदेश आधीच दिनांकित होता आणि त्यांना 'कारणे दाखवा नोटीस' न देताच हा आदेश प्रसिद्ध करण्यात आला. तसेच, त्यांच्या शिस्तीवर यापूर्वी कधीही कारवाई झाली नव्हती, उलट त्यांना प्रशस्तिपत्रके आणि पुरस्कार मिळाले आहेत. न्यायाधिकरणाने या सर्व बाबींचा विचार करून बदलीला स्थगिती दिली आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
