"भाजप नेत्यानं आम्हाला EVM हॅकिंगचा डेमो दाखवलेला"
मुंबई : खरा पंचनामा
निवडणूक आयोग सर्वोच्च न्यायालयापेक्षा मोठा आहे का, निवडणूक आयोगाचे आयुक्त राष्ट्रपतींपेक्षा मोठे झाले आहेत का, असे प्रश्न शिवसेना उबाठाचे प्रमुख उद्धव ठाकरेंनी उपस्थित केले.
लोकसभा निवडणुकीत झालेली मतांची चोरी आणि बिहारमध्ये निवडणूक आयोगाकडून राबवलं जाणारं विशेष अभियान यावरुन ठाकरेंनी निवडणूक आयोगाला लक्ष्य केलं. निवडणूक आयोगावर आरोप केल्यावर भाजपला मध्ये पडायची काय गरज होती, असा सवाल त्यांनी उपस्थित केला. मतांची चोरी लपवण्यासाठी भाजपचा आटापिटा सुरु असल्याचा दावा त्यांनी केला. ते मुंबईत पत्रकार परिषदेत बोलत होते.
विरोधी पक्षाच्या खासदारांनी दिल्लीत निवडणूक आयोगावर मोर्चा काढला होता. त्या मोर्चात सहभागी झालेल्या खासदारांची पोलिसांकडून धरपकड करण्यात आली. हा प्रकार निषेधार्ह आहे. लोकशाहीची हत्या संपूर्ण जगानं पाहिली. निवडणूक आयोगावर आरोप केल्यावर भाजपनं प्रत्युत्तर का दिलं, असा सवाल उद्धव ठाकरेंनी उपस्थित केला. लोकसभा निवडणुकीत मतांची चोरी झाल्याचं राहुल गांधी यांनी पुराव्यानिशी सिद्ध केलेलं आहे. आता स्थानिक स्वराज्य संस्थांच्या निवडणुकीतही असाच प्रकार घडण्याची शक्यता आहे. त्यामुळे मतदारांनी सतर्क राहावं. आपल्या पत्त्यावर आणखी कोणाची मतदार म्हणून नोंद नाही ना, याची खातरजमा करावी, असं आवाहन त्यांनी केलं.
विधानसभा निवडणुकीत १६० जागा मिळवून देऊ, असा दावा करणारे दोघे जण भेटले होते, असं राष्ट्रवादी काँग्रेस शपचे अध्यक्ष शरद पवार यांनी काही दिवसांपूर्वीच म्हटलं. तो धागा पकडत असे काही लोक तुम्हाला भेटले होते का, असा सवाल पत्रकारांनी ठाकरेंना विचारला. त्यावर असे लोक मला पूर्वी झालेल्या अनेक निवडणुकांवेळी भेटले. पण मी त्यांच्याकडे कधी लक्ष दिलं नाही. आपण प्रामाणिकपणे निवडणूक जिंकू, असा विश्वास असल्यानं गडबड करणाऱ्या लोकांची गरज कधी भासली नाही. पण ते लोक आता भेटायला हवेत. आता आम्हाला त्यांना भेटण्यात रस आहे, असं ठाकरे हसत हसत म्हणाले.
यावेळी उद्धव ठाकरे यांनी एक जुना किस्सादेखील सांगितला. भाजप नेता आणि ईव्हीएम हॅकिंगबद्दलचा किस्सा उद्धव यांनी माध्यमांसमोर सांगितला. आमची भाजपसोबत युती असताना भाजपच्या एका नेत्यानं ईव्हीएम हॅक कसं करतात, त्याचं प्रात्यक्षिकच समोर दाखवलं होतं. आम्ही हॅकिंगचा तो डेमो पाहिला होता, असं असं ठाकरे म्हणाले. त्यावर उपस्थित पत्रकारांनी तो भाजप नेता कोण, असा प्रश्न ठाकरेंना केला. त्यावर आता तो नेता भाजपमध्ये नेता राहिलेला आहे. तो नुसताच भाजपमध्ये आहे, असं उत्तर उद्धव ठाकरेंनी दिलं.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
