पोलीस उपनिरीक्षकासह चौघेजण निलंबित, पैसे घेत असल्याचा व्हिडीओ व्हायरल
मुंबई : खरा पंचनामा
मालवणी पोलीस ठाण्यातील चार पोलिसांना सेवेतून निलंबित करण्यात आले आहे. काही दिवसांपूर्वी या पोलिसांची चित्रफित समाजमाध्यमावर व्हायरल झाली होती. त्यात हे पोलीस कर्तव्य बजावत असताना पैसे घेत असल्याचा दावा करण्यात आला होता. त्याची दखल घेत या चौघांना निलंबितन करण्यात आले आहे. यामध्ये एका पोलीस उपनिरीक्षक आणि तीन कर्मचाऱ्यांचा समावेश आहे.
पोलिसांनी दिलेल्या माहितीनुसार, १६ सप्टेंबर रोजी मालवणी पोलिस ठाण्यातील उपनिरीक्षक प्रदीप कदम यांची एक चित्रफित व्हायरल झाली होती. ते कर्तव्य बजावत असताना पैसे घेत असल्याचा दावा या चित्रफितीत करण्यात आला होता. अशाच प्रकारची आणखी एक चित्रफित १८ सप्टेंबर रोजी व्हायरल झाली होती. त्यात मालवणी पोलीस ठाण्यातील पोलीस कर्मचारी संजय रासकर, विकास माळी आणि महेंद्रकुमार मराळ हे पैसे घेत असल्याचा दावा करण्यात आला होता. यामुळे खळबळ उडाली होती.
या प्रकरणाची दखल घेऊन पोलीस उपायुक्तांनी या चारही पोलिसांना निलंबित केले. अशा कृत्यामुळे पोलीस दलाची प्रतिमा मलीन होत असल्याचे उपायुक्तांनी सांगितले. या चारही पोलिसांची सध्या विभागीय पोलीस चौकशी सुरू आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
