ज्येष्ठ आयपीएस सदानंद दाते 3 जानेवारीपासून पोलीस महासंचालकपदी
राकेश अग्रवालांकडे NIA ची जबाबदारी
मुंबई : खरा पंचनामा
ज्येष्ठ आयपीएस अधिकारी सदानंद दाते यांना राष्ट्रीय तपास यंत्रणेच्या महासंचालकपदावरून मुक्त केल्यानंतर राकेश अग्रवाल यांच्याकडे NIA चा अतिरिक्त कार्यभार सोपवण्यात आला आहे. तर सदानंद दाते 3 जानेवारी 2026 पासून राज्याच्या पोलीस महासंचालकपदाची सूत्रे हाती घेणार आहेत. 1990 च्या बॅचचे वरिष्ठ आयपीएस अधिकारी सदानंद दाते केंद्र सरकारच्या मंजुरीनंतर 2 जानेवारी 2026 रोजी महाराष्ट्र केडरमध्ये परतत आहेत.
सदानंद दाते एनआयएचे महासंचालक म्हणून काम पाहत आहेत. महाराष्ट्रात परतल्यानंतर ते 3 जानेवारी रोजी निवृत्त होणाऱ्या पोलीस महासंचालक रश्मी शुक्ला यांची जागा घेतील. दाते यांची नियुक्ती राज्याच्या कायदा आणि सुव्यवस्था आणि अंतर्गत सुरक्षेसाठी महत्त्वाची मानली जाते. सदानंद दाते यांना पोलीस सेवेत दीर्घ आणि प्रभावी अनुभव आहे. ते एक कणखर, प्रामाणिक आणि क्षेत्रनियंत्रित अधिकारी म्हणून ओळखले जातात. त्यांनी यापूर्वी महाराष्ट्र दहशतवाद विरोधी पथकाचे (एटीएस) नेतृत्व केले होते आणि मुंबई पोलिसांमध्ये महत्त्वाच्या पदांवर काम केले होते, ज्यात सह पोलीस आयुक्त (गुन्हे) आणि सह पोलीस आयुक्त (कायदा आणि सुव्यवस्था) यांचा समावेश होता. 26/11 च्या मुंबई दहशतवादी हल्ल्यादरम्यान, कामा रुग्णालयात दहशतवाद्यांशी लढताना दाते गंभीर जखमी झाले होते. त्यांच्या या साहसाचे उदाहरण आजही दिले जाते.
नियमांनुसार, कोणत्याही राज्याच्या डीजीपीचा कार्यकाळ किमान दोन वर्षांचा असावा. निवृत्तीसाठी फारसा वेळ शिल्लक नसतानाही रश्मी शुक्ला यांची जानेवारी 2024 मध्ये महासंचालकपदी नियुक्ती करण्यात आली होती. परिणामी, त्यांना मुदतवाढ देण्यात आली. आता, सदानंद दाते महासंचालक बनल्यानंतर, त्यांचा कार्यकाळ 2027 च्या अखेरीपर्यंत राहण्याची अपेक्षा आहे. दरम्यान, सदानंद दाते NIA मधून मुक्त केल्यानंतर तपास यंत्रणेचे कामकाज विस्कळीत होऊ नये यासाठी, केंद्रीय गृह मंत्रालयाने वरिष्ठ आयपीएस अधिकारी राकेश अग्रवाल यांच्याकडे एनआयएच्या महासंचालकपदाचा अतिरिक्त कार्यभार सुपूर्द केला आहे. एनआयएचा नियमित प्रमुख नियुक्त होईपर्यंत ही व्यवस्था लागू राहील.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
