हायकोर्टाने नगरपालिका, नगरपंचायत निवडणुकीच्या निकालाची तारीख बदलली
निवडणूक आयोगाला जोरदार दणका
नागपूर : खरा पंचनामा
राज्य निवडणूक आयोगाने नगरपरिषदा व नगरपंचायतींच्या २४ नगराध्यक्ष आणि १५४ जागांवरील निवडणूक स्थगित केल्यानंतर आता निकालाबाबतही मोठी बातमी समोर आली आहे.
आयोगाच्या निर्णयाविरोधात मुंबई हायकोर्टाच्या नागपूर खंडपीठात याचिका दाखल करण्यात आली होती. या याचिकेमध्ये आज होत असलेल्या मतदानाचा निकालही पुढे ढकलण्याची मागणी करण्यात आली होती. ही मागणी हायकोर्टाने मान्य केली आहे.
नागपूर खंडपीठात आज मतमोजणीबाबत सुनावणी झाली. यामध्ये हायकोर्टाने आयोगाला झटका दिला आहे. आज सुरू असलेल्या निवडणुकांसाठीच्या मतदानाची मतमोजणी ३ डिसेंबरला होणार होती. पण हायकोर्टाने २१ डिसेंबरलाच सर्व मतमोजणी घेण्याचे आदेश दिले आहेत. आयोगाच्या सुधारित कार्यक्रमानुसार २४ अध्यक्षपदांच्या आणि विविध ठिकाणच्या १५४ सदस्यपदाच्या जागांसाठी २० डिसेंबरला मतदान होणार १५४ सदस्यपदाच्या जागांसाठी २० डिसेंबरला मतदान होणार आहे. तर २१ डिसेंबरला मतमोजणी आहे.
आता 21 डिसेंबरलाच राज्यातील सर्व २४६ नगरपरिषदा आणि ४२ नगरपंचायतींच्या निवडणुकांची मतमोजणी होणार आहे. तसेच २० डिसेंबरनंतरच एक्झिट पोलही प्रसिध्द करण्याचे आदेश कोर्टाने दिले आहेत. त्यामुळे आज एक्झिट पोल प्रसिध्द होणार नाहीत. आज सुरू असलेल्या मतदानाचा उद्या निकाल लावल्यास त्याचा नकारात्मक, सकारात्मक परिणाम पुढील निवडणुकांवर होऊ शकतो, अशी बाजू याचिकाकर्त्यांनी कोर्टात मांडली होती. ते न्यायालयाकडून मान्य करण्यात आले.
निवडणूक निर्णय अधिकाऱ्यांच्या निर्णयाविरुद्ध अपील असलेल्या प्रकरणांचा निर्णय २३ नोव्हेंबर रोजी किंवा त्यानंतर आल्याने संबंधित ठिकाणी सुधारित कार्यक्रमाप्रमाणे निवडणूक प्रक्रिया राबविण्यात येणार आहे. अध्यक्षपदासंदर्भातील अपिलांचा निकाल उशिरा आलेल्या नगरपरिषदा व नगरपंचायतीच्या संपूर्ण क्षेत्रासाठी निवडणूक प्रक्रिया सुधारीत कार्यक्रमानुसार राबविली जाईल. अध्यक्षपदासोबतच सदस्यपदांची एकत्रित निवडणूक घेण्याची कायद्यात तरतूद आहे. ज्या ठिकाणच्या सदस्यपदासाठी अपील होते, तिथे मात्र फक्त त्या जागेपुरताच सुधारित निवडणूक कार्यक्रम राबविला जाईल.
अपील कालावधीनंतरच्या टप्प्यांसाठीच्या सुधारित कार्यक्रमानुसार आता १० डिसेंबरला दुपारी ३ वाजेपर्यंत उमेदवारी अर्ज मागे घेता येतील. अंतिमरीत्या निवडणूक लढविणाऱ्या उमेदवारांची यादी आणि निवडणूक चिन्हांचे वाटप ११ डिसेंबरला होईल. ता. २० डिसेंबरला सकाळी ७.३० ते सायंकाळी ५.३० या वेळेत मतदान होईल. मतमोजणी २१ डिसेंबरला सकाळी १० वाजता सुरू होईल.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
