बारावीचा केमिस्ट्रीचा पेपर पुन्हा होणार?
महाराष्ट्र बोर्डानं स्पष्टच सांगितलं
पुणे : खरा पंचनामा
महाराष्ट्र राज्य माध्यमिक व उच्च माध्यमिक शिक्षण मंडळाच्या (HSC) बारावीच्या केमिस्ट्रीच्या पेपरवरून गेल्या काही दिवसांपासून सुरू असलेल्या गोंधळाला अखेर पूर्णविराम मिळाला आहे.
सोशल मीडियावर पेपर लीक झाल्याच्या चर्चांनी विद्यार्थी आणि पालकांमध्ये चिंतेचे वातावरण होते. मात्र, या प्रकरणावर बोर्डाने अधिकृत स्पष्टीकरण दिले असून, हा 'पेपर लीक' नसून काही खोडसाळ प्रवृत्तींनी केलेला प्रकार असल्याचे स्पष्ट केले आहे.
केमिस्ट्रीची परीक्षा पुन्हा घेतली जाणार का? असा विद्यार्थ्यांच्या मनात सर्वात मोठा प्रश्न होता. आता यावर महाराष्ट्र बोर्डाचे अध्यक्ष नंदकुमार बेडसे यांनी खुलासा केला आहे. ते म्हणाले, ही घटना तांत्रिकदृष्ट्या 'पेपर लीक' या व्याख्येत बसत नाही. ज्या वेळी व्हॉट्सअॅपवर प्रश्नपत्रिकेचे फोटो व्हायरल झाले, त्याआधीच सर्व विद्यार्थी परीक्षा केंद्रावर पोहोचले होते आणि प्रश्नपत्रिका त्यांच्या हातात पडल्या होत्या. त्यामुळे या प्रकारामुळे विद्यार्थ्यांना कोणताही गैरफायदा मिळालेला नाही. परिणामी, केमिस्ट्रीची परीक्षा पुन्हा घेतली जाणार नाही.
नागपूरमधील एका परीक्षा केंद्रावर परीक्षेदरम्यान एक विद्यार्थिनी मोबाईल फोनसह पकडली गेली होती. जेव्हा तिच्या फोनची तपासणी करण्यात आली, तेव्हा धक्कादायक माहिती समोर आली. परीक्षा सुरू होण्याच्या काही मिनिटे आधी केमिस्ट्रीच्या प्रश्नपत्रिकेचे फोटो एका व्हॉट्सअॅप ग्रुपवर शेअर करण्यात आले होते. याप्रकरणी पोलिसांनी तत्काळ कारवाई करत नागपूरमधून दोन जणांना अटक केली आहे.
पोलिसांनी दिलेल्या माहितीनुसार, अटक करण्यात आलेल्या दोन आरोपींपैकी एक जण एका छोट्या खाजगी ट्युशन क्लासशी संबंधित आहे, तर दुसरा त्या व्हॉट्सअॅप ग्रुपचा सदस्य होता जिथे पेपर फिरत होता. बोर्ड अध्यक्षांनी सांगितले की, "हा प्रकार मोठ्या स्तरावर झालेला घोटाळा नाही. पेपर व्हायरल होण्याचे मूळ शोधण्याचे काम पोलीस करत आहेत. सध्या परीक्षा सुरू असल्याने आम्ही अद्याप विद्यार्थ्यांची चौकशी केलेली नाही." जोपर्यंत मुख्य सूत्रधार सापडत नाही, तोपर्यंत आरोपींची अधिक माहिती उघड करता येणार नसल्याचेही पोलिसांनी सांगितले.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
