चिमुरडीच्या हत्येने राज्य रडतेय, अन् महिला अधिकाऱ्याचा निर्लज्जपणाचा कळस
तामिळनाडूतील व्हायरल व्हिडिओने देश संतापला
कोयंबतूर : खरा पंचनामा
तामिळनाडूमधील कोयंबतूर येथील अल्पवयीन मुलीच्या बलात्कार आणि हत्येच्या प्रकरणावर माध्यमांशी बोलण्यापूर्वी हसताना दिसलेल्या एका वरिष्ठ महिला पोलीस अधिकाऱ्यांचा व्हिडीओ सोशल मीडियावर व्हायरल झाल्यानंतर मोठा वाद निर्माण झाला आहे. या व्हिडीओमुळे संताप व्यक्त केला जात असून संबंधित अधिकाऱ्यांवर असंवेदनशीलतेचे आरोप होत आहेत.
पश्चिम विभागाच्या पोलीस महानिरीक्षक (IG) आर. व्ही. रम्या भारती या या वादाच्या केंद्रस्थानी आल्या आहेत. कोयंबतूरमधील अल्पवयीन मुलीवरील लैंगिक अत्याचार आणि हत्येच्या प्रकरणासंदर्भात पत्रकार परिषद घेण्यापूर्वीचा त्यांचा व्हिडीओ सोशल मीडियावर मोठ्या प्रमाणात व्हायरल झाला.
या व्हिडीओमध्ये रम्या भारती पत्रकार परिषद सुरू होण्यापूर्वी हसताना आणि सहज संवाद साधताना दिसत आहेत. त्यानंतर त्या माध्यमांशी या संवेदनशील प्रकरणावर बोलताना दिसतात. मात्र या दृश्यांमुळे सोशल मीडियावर तीव्र प्रतिक्रिया उमटल्या असून अनेकांनी या गंभीर गुन्ह्याच्या पार्श्वभूमीवर वरिष्ठ अधिकाऱ्यांच्या वर्तनावर प्रश्न उपस्थित केले आहेत.
एका सोशल मीडिया वापरकर्त्याने लिहिले, संपूर्ण राज्य एका निष्पाप मुलीच्या क्रूर हत्येमुळे शोक व्यक्त करत आहे आणि वरिष्ठ अधिकारी पत्रकार परिषदपूर्वी हसताना दिसत आहेत. अशाच प्रकारच्या प्रतिक्रिया मोठ्या प्रमाणात सोशल मीडियावर पाहायला मिळत आहेत.
दरम्यान कोयंबतूरजवळील सुलूर परिसरात 10 वर्षीय मुलीचे अपहरण, लैंगिक अत्याचार आणि हत्या झाल्याच्या प्रकरणामुळे संपूर्ण तामिळनाडूमध्ये संतापाची लाट उसळली आहे. या घटनेवरून आंदोलनं होत असून सत्ताधारी TVK सरकारवरही विरोधकांकडून टीका केली जात आहे.
विशेष म्हणजे याच दिवशी तामिळनाडूच्या उद्योगमंत्री एस. कीर्तनाही वादात सापडल्या. या प्रकरणासंदर्भात माध्यमांशी बोलताना त्या स्मितहास्य करत असल्याचा दुसरा व्हिडीओ व्हायरल झाला आणि त्यावरून त्यांच्यावरही टीका झाली. अधिकृत बैठकीनंतर पत्रकारांनी हत्या प्रकरणाबाबत प्रश्न विचारल्यानंतर कीर्तना यांनी मी फक्त प्रशासकीय प्रश्नांनाच उत्तर देईन, असे सांगितले होते. त्यानंतरचा त्यांचा व्हिडीओ सोशल मीडियावर व्हायरल झाला.
भाजप नेत्यांनी कीर्तना यांच्यावर असंवेदनशीलता दाखवल्याचा आरोप केला. तसेच हत्या प्रकरणाबाबतच्या प्रश्नांवर उत्तर देताना त्या निष्काळजी आणि उदासीन दिसत असल्याचा आरोपही करण्यात आला.
वाद वाढल्यानंतर कीर्तना यांनी स्पष्टीकरण दिले. त्यांनी म्हटले की, त्यांच्या हावभावांचा चुकीचा अर्थ लावला जात असून राजकीय हेतूने त्याचे विकृतीकरण केले जात आहे. पत्रकार परिषद संपताना सहजपणे स्मितहास्य झाले होते आणि त्याचा गुन्हा किंवा पत्रकारांच्या प्रश्नांशी कोणताही संबंध नव्हता, असे त्यांनी स्पष्ट केले.
या दोन्ही घटनांमुळे राज्य सरकार आणि वरिष्ठ अधिकाऱ्यांवरील दबाव आणखी वाढला आहे. अल्पवयीन मुलीच्या हत्येच्या प्रकरणामुळे आधीच जनतेमध्ये तीव्र संताप आहे आणि अशा व्हिडीओंमुळे सरकारवर अधिक टीका होत आहे.
मुख्यमंत्री सी. जोसेफ विजय यांनी या प्रकरणात जलद कारवाई आणि फास्ट-ट्रॅक तपासाचे आश्वासन दिले आहे. पोलिसांनी या गुन्ह्याप्रकरणी दोन आरोपींना अटक केली आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
