व्हॉलीबॉल स्पर्धेत सांगलीच्या मुला-मुलींच्या संघांचे दैदीप्यमान यश
दोन्ही अंतिम सामन्यांत ३-० ने दणदणीत विजय
पूजा फडके
सांगली : खरा पंचनामा
कोल्हापूर परीक्षेत्रीय पोलीस क्रीडा स्पर्धेतील व्हॉलीबॉलच्या अंतिम सामन्यांमध्ये सांगलीच्या मुले आणि मुलींच्या दोन्ही संघांनी अत्यंत चमकदार कामगिरी करत अजिंक्यपद पटकावले आहे. मुलींच्या अंतिम फेरीत सांगली आणि कोल्हापूर या दोन तुल्यबळ संघांमध्ये अटीतटीचा सामना रंगला होता. या रोमहर्षक सामन्यात सांगलीच्या महिला संघाने कोल्हापूरचा २५-१९, २५-२३ आणि २५-२१ असा सरळ तीन सेटमध्ये पराभव करत विजेतेपदावर आपले नाव कोरले. सांगलीच्या विजयात एपीआय रुपाली बोबडे, सुधा मोरे, तेजस्विनी पाटील आणि मनीषा साबळे यांनी उत्कृष्ट खेळाचे प्रदर्शन केले. या विजेत्या संघाला प्रशिक्षक सचिन कनप आणि आसिफ सनदी यांचे मोलाचे मार्गदर्शन लाभले. दुसरीकडे उपविजेत्या ठरलेल्या कोल्हापूरच्या संघातून डीवायएसपी प्रिया पाटील आणि एपीआय शिल्पा यमगेकर यांनी उत्तम लढा दिला, तर प्रशिक्षक कुलदीप सूर्यवंशी आणि रमेश कांबळे यांनी संघाचे नेतृत्व केले.
मुलांच्या अंतिम सामन्यातही सांगलीच्या संघाने आपले वर्चस्व कायम राखत सातारा संघाचा ३-० अशा मोठ्या फरकाने पराभव केला. सुरुवातीपासूनच आक्रमक खेळ करत सांगलीच्या खेळाडूंनी प्रतिस्पर्धी सातारा संघाला पुनरागमन करण्याची कोणतीही संधी दिली नाही. सांगलीच्या या दणदणीत विजयात किशोर कदम, राहुल दिवाण, सचिन भोसले आणि तोहीद मुजावर यांनी उत्कृष्ट कामगिरी करत प्रेक्षकांची मने जिंकली. मुला-मुलींच्या दोन्ही श्रेणींमध्ये सांगलीच्या खेळाडूंनी मिळवलेल्या या दुहेरी यशामुळे संपूर्ण सांगली जिल्ह्यात आनंदाचे वातावरण पसरले असून सर्व स्तरातून विजेत्या खेळाडूंचे व प्रशिक्षकांचे कौतुक केले जात आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.